'பாவை விளக்கின் ஒளிச்சிதறல்கள்’ - மின்னூல் - மதிப்புரை

( பிப்ரவரி 2013 - வல்லமையில் வெளியாகியுள்ள படம்)

மின்னூல் ஆசிரியர்

திருமதி.  ஜெயஸ்ரீ  அவர்கள்

 

 

மின்னூல்கள் மூலம்

இவரைப்பற்றி நாம் அறிவது

http://www.pustaka.co.in/home/author/jayasree-shankar

1964-இல் மதுரையில் பிறந்து வளர்ந்தவள். அவரது தந்தையார், காலம்சென்ற திரு. பேரை. சுப்ரமணியன், (South Central Railways, Secunderabad) எழுத்தாளர். 1960-இல், ஆனந்த விகடன், கல்கி, கலைமகள், குமுதம் போன்ற முன்னணி பத்திரிகைகளில் நிறைய சிறுகதைகள், எழுதிப் பல பரிசுகள் பெற்றவர். அகில இந்திய வானொலியில் ஒலிபரப்பாகிய பல நாடகங்களின் கதாசிரியர். அவரது தாய் திருமதி. சரஸ்வதி சுப்ரமணியம், அவரை எழுதச் சொல்லி ஆசி வழங்கியவர்.

1988-ல் இவரது சிறுகதைகள் பெண்மணி, மங்கை, மங்கையர் மலர், போன்ற மகளிர் பத்திரிகைகளில் வெளி வந்துள்ளது.

2009 லிருந்து இணையத்தில் எழுத ஆரம்பித்து, கட்டுரைகள், கவிதைகள், ஹைகூ கவிதைகள், சிறுகதைகள், நெடுங்கதைகள், தொடர்கதைகள் ஆகிய படைப்புகள் இணைய தளத்தின் முன்னணி வார இதழ்களான திண்ணை, வல்லமை, வெற்றிநடை, மூன்றாம்கோணம், சிறுகதைகள்.காம் போன்ற வலை தளங்களிலும், குங்குமம் தோழி ஆகிய தமிழ் பத்திரிகைகளிலும் பிரசுரமாகி வருகிறது.

என் பார்வையில் 

'பாவை விளக்கின் 

ஒளிச்சிதறல்கள்’

மின்னூல்

மொத்தம் 181 பக்கங்கள் கொண்ட  இந்த மின்னூலில் நவரத்தினங்களாக ஜொலிக்கும் + நவரசங்கள் ததும்பும் ஒன்பது கதைகள் இடம் பெற்றுள்ளன. ஒவ்வொரு கதை பற்றியும், சுருக்கமாக ஒருசில வரிகள் மட்டும் இங்கு நான் குறிப்பிட்டுச் சொல்ல விரும்புகிறேன்.

(1)  தொட்டில்

மிகவும் அருமையானதொரு கதை. பெற்றோர் சம்மதமின்றி காதலித்து, போலீஸ் ஸ்டேஷனில் நண்பர்கள் உதவியால் மணம் செய்துகொண்ட தம்பதியனர் அவர்கள். பெற்றோர்கள் கொடுத்த சாபமோ என்னவோ குழந்தைப்பேறு உண்டாகவில்லை. 

ஏதேதோ வைத்தியங்கள் பார்த்தாச்சு. சமூகத்தில் எவ்வளவோ அவமானங்களைச் சந்திச்சாச்சு. தான் பார்த்துவந்த கெளரவமான வங்கி வேலையையும் அந்த மனைவி உதறித்தள்ளியாச்சு. குழந்தையில்லாததொரு தம்பதியினரின் ஏக்கங்களை வெகு அழகாகச் சொல்லியுள்ளார்கள் இந்தக்கதையில்.  

கடைசி முயற்சியாக ஒரு மருத்துவமனையை அணுகிப்பார்க்கிறார்கள். அங்கும் நம்பிக்கை தரப்படவில்லை. வாடகைத்தாயாக இருக்க பலரின் ஏழ்மை நிலையைப் பயன்படுத்தி புரோக்கர் வேலை செய்ய நினைக்கிறது அந்த ஆஸ்பத்தரி நிர்வாகம். வாடகைத் தாயாக முன்வரத் தயாராக இருக்கும் பல அழகிகள் வரிசையாகக் காட்சிப்படுத்தப் படுகிறார்கள். வெறுத்துப்போய் வெளியேறி வீட்டுக்கு வர காரை எடுக்கும் வேளையில் எதிர்பாராததோர் ஆச்சர்யம் நடக்கிறது ...... 

திருமணம் ஆகி 25 ஆண்டுகள் ஆன அந்த தம்பதியினருக்கு மிகவும் மகிழ்ச்சியும் மன நிம்மதியும் ஏற்படுகிறது. அப்படி அந்த நொடிப்பொழுதினில் என்னதான் நிகழ்ந்தது என்பதை இந்தக்கதையினைப் படித்து தெரிந்து கொள்ளவும். 

(2)  பெற்ற கடன் அடைக்கும் பிள்ளைகள் 

மிகவும் அற்புதமான கதை. தான் வரிசையாகப் பெற்ற ஐந்து ஆண் பிள்ளைகள் ஒவ்வொன்றையும் பீடி சுற்றும் கம்பெனியில் அடமானமாக வைத்து காசு பெற்று சாராயமும் பீடியும் குடித்து மகிழும் கணவன். ஆறாவதாக ஓர் பெண் குழந்தை பிறக்குது. அதுவும் ஆண் பிள்ளையாக இருப்பின் அதற்கு ஐந்து வயது ஆனதும் அதனையும் அடமானமாக வைத்து மூத்தபிள்ளையை மட்டுமாவது மீட்கலாம் என்ற ஓர் சின்ன ஆசை இருந்தது. அது முடியாமல் போனதில் கணவன் - மனைவி இருவருக்குமே வருத்தம்.  

மனைவிக்கு தன் குழந்தைகளைப்பார்க்கணும் போல ஆசை. கணவனை வற்புருத்தி அந்த பீடி சுற்றும் கம்பெனிக்குக் கூட்டிப்போகச் சொல்கிறாள். அங்கு தன் பிள்ளைகள் படும் கஷ்டத்தையும் வாங்கும் அடி உதைகளையும் காண சகிக்காமல் பீடிக்கம்பெனி முதலாளியின் காலில் விழுந்து கெஞ்சி, எண்ணெய் காணா பரட்டைத் தலைகளுடனும், ஒட்டிய வயிற்றுடனும் எலும்பும் தோலுமாக உள்ள தன் ஐந்து ஆண் குழந்தைகளையும் ஒரேயடியாக மீட்டு, அவர்களுக்குத் தங்கச்சியாகப் பிறந்துள்ள பெண் குழந்தையுடன் சந்தோஷமாக வீட்டுக்குக் கூட்டி வருகிறாள். 

அவள் என்ன செய்து, எதை அடமானமாக வைத்து, இவ்வாறு எல்லாக் குழந்தைகளையும் ஒரே நாளில் ஓரேயடியாக மீட்டு வர முடிந்தது என்ற கிளைமாக்ஸை கதையில் படித்துத் தெரிந்து கொண்டால் மட்டுமே மிகச் சிறப்பாக இருக்கும்.

(3)  இன்று போய் நாளை வா

ஒரு சாதாரண குடும்பக்கதையில், அந்த இல்லத்தரசி மூலம், ஏதேதோ சஸ்பென்ஸ் கொடுத்து, நல்ல நகைச்சுவையுடன், படிக்க சுவாரஸ்யமாக எழுதி முடித்துள்ளார்கள். இறுதியில் அனைவரும் ஏற்றுக்கொள்ளக்கூடிய நல்லதொரு செய்தியும் சொல்லப்பட்டுள்ளது. இந்தக் கதையை அவர்களின் வலைத்தளத்தினிலேயே படித்த நினைவும் எனக்கு வந்தது.

(4)  தேரில் ஏறும் முன்னம்:

ஓர் இளம் பெண்ணும், ஓர் ஆடவனும் திருமணத்திற்கு முன்பே பழகி, தனிமையில் இனிமையாக வெளியே பல இடங்களைச் சுற்றி, ஒருவரைப்பற்றி ஒருவர் புரிந்துகொள்வதை பொதுவாக நம்மில் பலரும் தவறு என்று நினைப்போம். 

இந்தக்கதையில் அவ்வாறே ஒரு நாள் ஒரு பெண், தன் Boy Friend உடன் டேட்டிங் செய்யப் புறப்படுகிறாள். காலையில் நன்கு மேக்-அப் செய்துகொண்டு அட்டகாசமாகப் புறப்பட்டவள், இரவு வெகு நேரம் கழித்து தன் ரூமுக்கு வந்து தன் தோழியிடம் நடந்ததையெல்லாம் ஒவ்வொன்றாகச் சொல்லி பூரித்து மகிழ்கிறாள். 

ஆர்வத்துடன் கூடிய தோழியின் பல தூண்டுதல் கேள்விகளும், வெட்கத்துடன் கூடிய இவளின் பதில்களும், படிக்க வெகு சுவாரஸ்யமாக உள்ளன. 

கடைசியில் என்னதான் நடந்தது என்பதை மின்னூலில் படித்துத் தெரிந்து கொண்டால் மேலும் சுவாரஸ்யம் அதிகமாக இருக்கும். இந்தக் கதையும் இவர்களின் வலைத்தளத்தினில் படித்த ஞாபகம் எனக்கு உள்ளது.

(5)  பாதை மறந்த பருந்து:

பொறுப்பற்ற பிள்ளையைப் பற்றிய இந்தக் கதை படிக்கும்போதே நமக்கும் அவன்மேல் வெறுப்பு ஏற்பட மட்டுமே செய்கிறது. அப்பாவுக்கும் பிள்ளைக்கும் நடுவே மாட்டிக்கொண்டு தத்தளிக்கும் அம்மா கதாபாத்திரம் அருமை. ஒரு நன்றியுள்ள தெரு நாய் பிள்ளையைத் திருத்தியது அருமையான க்ளைமாக்ஸ் ஆக உள்ளது.  ஏற்கனவே இவர்களின் வலைத்தளத்தினில் படித்த நினைவும் உள்ளது.

(6)  தன்னைச் சுடும்:

அதீத கற்பனைகளுடன் எழுதப்பட்டுள்ளதோர் கதை. புராணக்கதைகளில் ஒரு குழந்தை கர்ப்பவாசத்தில் தன் தாயின் வயிற்றுக்குள் இருக்கும்போதே, அதற்கான போதனைகள் நாரதர் போன்ற மகரிஷிகளால் செய்யப்பட்டு, பிறக்கும்போதே அனைத்தையும் அறிந்த மஹாமேதாவியாக இருந்ததாகக் கேள்விப்பட்டுள்ளோம். 

அதுபோலவே, மூன்று மாதமே ஆன தன் குழந்தையை, ஏராளமான பணச்செலவில், ஓர் மிகச்சிறப்பான பள்ளியில் சேர்த்து, அவனுக்கு ஏதேதோ அறிவுகளைப் பலவந்தமாகப் புகுத்தி, மண்டையில் திணித்து அவனை உலகப்புகழ் பெற்றவனாக மாற்றத் துடிக்கிறாள், மிகவும் பிடிவாதக்காரியான பார்கவி என்பவள். இதில் அவளின் மாமியார் சொல்லோ, கணவனின் சொல்லே எடுபடவே இல்லை. 

பார்கவியே எதிர்பாராத அளவுக்கு அவன் மிகவும் புத்திசாலியாகவே வளர்கிறான். இருப்பினும் ஊரோடு ஒத்து வராத பையனாக இருப்பதால் பல்வேறு சோதனைகளை அவள் காண நேர்ந்து ஒரு ஸ்டேஜில் மிரண்டே போய் விடுகிறாள்.

பிஞ்சுப்பருவத்திலேயே பள்ளியில் அவனுக்கு ஒரு பெண்ணுடன் காதல் ஏற்பட்டு அதுவே மிகப்பெரிய பிரச்சனையாகி விடுகிறது. 

முப்பது வயதுக்குள் அந்தப்பிள்ளை ஒரு ஞானி போல ஆகி வீட்டைவிட்டே வெளியேறி எங்கோ இமயமலையை நோக்கிக் கிளம்பி விடுகிறான். 

ஒரு நாள், அகாலத்தில் யாரோ பார்கவி வீட்டுக் கதவைத் தட்டுகிறார்கள். தன் பிள்ளைதான் திரும்பி வந்துவிட்டானோ என ஆவலுடன் கதவைத்திறந்த பார்கவிக்கு ஓர் மாபெரும் அதிர்ச்சி ஏற்படுகிறது. 

இதுவரை பார்த்ததே இல்லாத இரு புதியவர்களின் வருகையால், பார்கவிக்கு ஏற்பட்ட மாபெரும் அதிர்ச்சி கதையில் மிகவும் சுவாரஸ்யமான கட்டமாக காட்டப்பட்டுள்ளது. 

அதிலுள்ள சுவாரஸ்யம் பற்றி, கதாசிரியரின் எழுத்து நடையில் மின்னூலைப் படித்துத் தெரிந்துகொள்ளுங்கள்.

(7)  அவள் வாழ்வு அவ்வளவுதான்:

இந்த மின்னூலிலுள்ள கதைகளிலேயே என்னை மிகவும் கவர்ந்த கதை இது. ஒரு பெண் என்னும் இயந்திரத்தின் கதையை வெகு அழகாகச் சொல்லியுள்ளார்கள். 

பங்களா, கார், பணக்காரக் கணவர், மகன், மகள், பணம், வசதி வாய்ப்புகள் எல்லாமே உள்ளன. இருந்தும் என்ன? எல்லோருக்காகவும் இவள் ஒருத்தியே மாடாக உழைத்து ஓடாகத் தேய்ந்து வருகிறாள். 

ஆரம்பத்தில் தன்னைக்காதலித்துச் சுற்றிச்சுற்றி வந்த கணவனுக்கு இப்போதெல்லாம் தன்னைப் பார்க்கவே பிடிப்பது இல்லை.** 

[** அது எப்படிப்பிடிக்கும்? இதற்கான உண்மைக் காரணம் நான் எழுதியுள்ள ஓர் கதையில் உள்ளது. https://gopu1949.blogspot.in/2014/04/vgk-13.html - பகுதி-5 ]


ஆபீஸ் வேலைகள் - அபீஷியல் ட்யூர் - லாப்டாப் ஆகியவற்றுடனேயே அவரின் பொழுது எப்போதுமே போய் விடுகிறது. அதிகாரம் மட்டும் எப்போதுமே கொடிகட்டிப் பறக்கிறது. 

ஒரே பிள்ளை எப்போதும் யாருடனோ மொபைலில் பேசிக்கொண்டே ..... பெண் தொலைகாட்சிப்பெட்டியுடன் ரிமோட்டும் கையுமாக ..... இவள் உடல்நிலை சரியில்லாமல் படுத்தால் வீட்டுக்குள்ளேயே, இவளைப்பற்றிக் கேட்கவோ கவனிக்கவோ நாதியில்லை. 

நடுத்தர வயதின் கோளாறுகள், உதிரப்போக்கு, கர்ப்பப்பை நீக்கம் என ஏதேதோ சோதனைகள் வந்தும், தான் படும் கஷ்டம் கொஞ்சமும் தெரியாத தன் சொந்த உறவுகளால், அவளின் வாழ்க்கை அர்த்தமில்லாத வாழ்க்கையாகப் போய்க்கொண்டே உள்ளது. 

எதிர் வீட்டில் புதிதாகக் குடி வந்திருக்கும், இளம் பெண் ஒருத்தி,  தன்னைத் தேடி, அடிக்கடி பைக்கில் வந்துபோகும் ஒருவருடன் கூத்தடித்துக்கொண்டு உல்லாசமாக இருப்பதை,  அடிக்கடி இவள் தன் அறை ஜன்னல் மூலம் காண நேரிடுகிறது. தனக்கு இன்று கிடைக்காத அன்பும் சந்தோஷங்களுமான அவை தன் கண்களில் பட்டு தன்னை ஹிம்சிக்காமல் இருக்க, தன் வீட்டு ஜன்னலை திரை போட்டு மூடுவதைத் தவிர வேறெதும் செய்வதற்கு இல்லை இவளுக்கு.

ஒரு நடுத்தர வயது இல்லத்தரசியான பெண்ணின் அவல நிலையையும், ஏக்கங்களையும், நியாயமான எதிர்பார்ப்புகளையும், கூறிடும் இந்தக்கதையை மிகவும் அருமையாக எழுதி முத்திரை பதித்துள்ளார்கள். 



 சபாஷ் !  

      

(8)  விஸ்வநாதன் வேலை வேண்டாம்:

இஞ்சினியரிங் படித்து முடித்தும் வேலை கிடைக்காத வாலிபன் பற்றிய கதை. தன் படிப்புக்கு ஏற்ற வேலை கிடைக்கா விட்டால், அதனை எதிர்பார்த்து ஏங்காமல், கிடைத்த வேலையை ஏற்றுக்கொண்டு அதில் முன்னேறுவதே புத்திசாலித்தனம் என்பதைச் சொல்லும் கதை.

மிகவும் ரசித்த வரிகள்:

அவனை அழைத்த கம்பெனியின், அதி நவீன அசர வைக்கும் கண்ணாடிப் புடவை கட்டிக்கொண்ட பிரும்மாண்ட கட்டடத்தைப் பார்த்ததும், இதயம் லப்-டப் எனத் துடிப்பதை மறந்து அதன் அழகில் மயங்கிப்போனது.

எதிர்வீட்டு மாமி கிருஷ்ணா ஸ்வீட்ஸ் மைசூர்பாக்கை நீட்டி, “என் பொண்ணு மைதிலிக்கு பெங்களூர்ல வேலை கிடைச்சுருக்கு. இன்னிக்குக் குழந்தை ப்ளைட்ல கிளம்பிண்டு இருக்கா” என்று கடுப்பேத்தி விட்டுப்போனதும்.... வாயில் வைத்த மைசூர்பாக் கூட கசந்து வழிகிறது அவனுக்கு.      

(9)  கலியுகத் தாயின் கீதா உபதேசம் :

சமூக சிந்தனையை ஊட்டும் மிகவும் அருமையான கதை. ஏதுமறியா மாணவச் செல்வங்களையும், அவர்களின் ஒட்டுமொத்தமான மிகப்பெரிய பலத்தையும், அரசியல்வாதிகள் எவ்வாறு திசைதிருப்பி, தங்களுக்கான அரசியல் ஆதாயம் அடைகிறார்கள் என்பதை, ஒரு கல்வி நிறுவனத்தில் முதல்வராகவும், வேறு கல்லூரியில் படிக்கும் தன் அன்பு மகனின் பாசத்திற்கு உரிய தாயாகவும் ஒரு கதாபாத்திரம் பேசுவதாகக் காட்டி, நன்கு புட்டுப்புட்டு வைத்துள்ளார்கள். கதையின் தலைப்பும் கதையில் உள்ள கருத்துக்களும் மிகவும் பாராட்டப்பட வேண்டியவைகளாக உள்ளன.

காவியத்தில் மட்டுமல்லாமல் தன் கை 

ஓவியத்திலும் கலக்கிடும் ஜெயஸ்ரீ மேடம்!

‘பாவை விளக்கின் ஒளிச்சிதறல்கள்’ 

என்ற தனது மின்னூலை அன்பளிப்பாக 
எனக்கு அனுப்பி வைத்து 
வாசிக்க வாய்ப்பளித்துள்ள
சகலகலா வாணியான
 திருமதி. ஜெயஸ்ரீ மேடம் 
அவர்களுக்கு 
என் அன்பான நன்றிகளைத் தெரிவித்துக்கொள்கிறேன். 

இந்த மின்னூலை உடனடியாக படிக்க விருப்பமுள்ளோர் 

http://www.pustaka.co.in/home/ebook/tamil/paavai-vilakkin-olichitharalgal 
என்ற இணைப்புக்குச் சென்று ’Buy Now’ என்பதை க்ளிக் செய்யுங்கோ, போதும். 
உங்களைத்தேடி மின்னல் வேகத்தில் இந்த மின்னூல் வந்து சேரும் . 

  

ஸ்ரீ குரு க்ருபை இருந்தால்

திருமதி. ஜெயஸ்ரீ அவர்களின் 

அடுத்த மின்னூல் மதிப்புரையில் 
மீண்டும் நாம் சந்திப்போம்.

 

என்றும் அன்புடன் தங்கள்,