சித்திரையில் சில சிந்தனைகள் !

ஸ்ரீ மத்ஸ்ய ஜயந்தி 
18.04.2012 புதன் கிழமை

பகவான் ஸ்ரீ மஹாவிஷ்ணு பூமியில் மஹாபிரளய காலத்தில் மீன் உருவத்தில் அவதரித்த நன்நாளான இன்று காலையில் மத்ஸ்ய ஸ்வரூபியான பகவானை முறையாக பூஜைகள் செய்து ஸ்தோத்ரங்கள் சொல்லி ப்ரார்த்தித்துக்கொண்டு தம்பதியாய் கீழ்க்கண்ட ஸ்லோகங்கள் சொல்லி சுத்த ஜலத்தினால் அர்க்யம் தரலாம்.

ஸத்யவிரதோபதே3சாய ஜிஹ்மமீன ஸ்வரூப த்4ருக்

ப்ரலயாப்3தி4 க்ருதாவாஸ க்2ருஹாணார்க்4யம்

நமோஸ்துதே, மத்ஸ்ய ஸ்வரூபாய விஷ்ணவே நம: 

இதமர்க்யம், இதமர்க்யம்,இதமர்க்யம்

அநேந அர்க்4ய ப்ரதா3னேன மத்யஸ்வரூபி ப4கவான் ப்ரீயதாம்.

ooooOoooo 

பகவான் ஸ்ரீ ரமண மகரிஷி 

62 ஆவது வருஷ ஆராதனை

18.04.2012 புதன்கிழமை

சுமார் 125 வருஷங்களுக்கு முன் மதுரைக்கு அருகில் திருச்சுழியில் பரமேஸ்வரனின் அவதாரமாகத் தோன்றி, திருவண்ணாமலையில் கடுமையான தபஸ் செய்து, ஆத்ம தரிஸனம் கண்ட மஹான் பகவான் ஸ்ரீ ரமணர். தான் கண்ட ஜோதியை ஏராளமான பக்தர்களும் காணச்செய்து அவர்களின் ஆத்ம ஜ்யோதிஸ்ஸைத் தூண்டிவிட்ட மஹான்.

திருவண்ணாமலையில் ஸமாதியில் இருந்தபடியே இன்றும் பக்தர்களுக்கு அருளாசி வழங்கும் இவரின் 62 ஆவடு ஸித்தி தினம், சித்திரை மாத க்ருஷ்ணபக்ஷ த்ரயோதஸியான இன்று [18.04.2012 புதன்கிழமை] பல இடங்களில் நடைபெறுகிறது.

நாமும் இதில் கலந்துகொண்டு இவரை நமஸ்கரித்து, இவர் இயற்றிய அருணாசல அக்ஷரமணிமாலை முதலிய ஸ்தோத்ரங்களை பாராயணம் செய்து, ஆத்மவிசாரம் செய்து நன்மையடைவோமாக!

-ooooooooooooOoooooooooooo- 

வைசாக ஸ்நானம் 

22.04.2012 முதல் 20.05.2012 வரை

சித்திரை மாதம் அமாவாசைக்கு மறுநாள் பிரதமை முதல் வைகாசி மாதம் அமாவாசை வரையில் உள்ள 30 நாட்களுகு வைஸாக மாதம் என்று பெயர்.

இந்த வைசாக மாதத்தில் அதிகாலையில் [நதி, ஏரி, குளம், கிணறு முதலியவற்றில்] கீழ்க்கண்ட ஸ்லோகம் சொல்லி முறையாக ஸ்நானம் செய்வதால் பாபங்கள் விலகி மனதுக்கு நிம்மதியும், நல்ல ஆஸ்தீகமான எண்ணங்களும், தன்னம்பிக்கையும் ஏற்படும். மாதம் முழுவதும் ஸ்நானம் செய்ய முடியாதவர்கள் முதல் மூன்று நாட்கள் அல்லது கடைசி மூன்று நாட்களாவது வைசாக ஸ்நானத்தை முறையாகச் செய்து நன்மையடைய முயற்சிக்கலாம்.

ஸ்நான ஸ்லோகம்:

மாத4வே மேஷகே3 பா4நெள முராரே ! 

மது4ஸூத3ன!

ப்ராத: ஸ்னாநேன மே நாத2 ! 

ப2லதோ ப4வ பாபஹந்


-oooooOooooo-


சந்திர தரிசனம் 
22.04.2012 ஞாயிற்றுக்கிழமை

ஒவ்வொரு மாதமும் சுக்ல பக்ஷ த்விதீயையன்று [அமாவாசைக்கு அடுத்த இரண்டாம் நாள்] இரவில் மூன்றாம் பிறை சந்திரனை, கீழ்க்கண்ட ஸ்லோகம் சொல்லி தரிஸனம் செய்வது மிகச்சிறந்தது. 

த3தி4 ஸங்க2 துஷாராப4ம் க்ஷீரோதா3ர்ணவ ஸம்ப4வம்

நமாமி ஸஸிநம் ஸோமம் ஸம்போ4ர் மகுட பூ4ஷணம்

இவ்வாறு மூன்றாம் பிறைச்சந்திரனை தொடர்ந்து ஒவ்வொரு மாதமும் தரிஸிப்பதால் மனதில் உள்ள கல்மஷங்கள் பாபங்கள் குழப்பங்கள் விலகி மன நிம்மதியும் , தெளிவான ஞானமும் ஆரோக்கியமும், தம்பதிகளுக்குள் ஒற்றுமையும் ஏற்படும்.

இந்த மூனறாம் பிறைச்சந்திரனை நாம் வானத்தில் சற்று சிரமப்பட்டு தேடிக்கண்டுபிடித்து தரிஸிக்கும் படியாக இருக்கும்.  மெல்லிய தங்கக் கம்பியில் செய்த மோதிரம் போல அழகாக வளைவாகக் காட்சி தரும்.

நாலாம் பிறைச் சந்திரன் பளிச்சென்று நம் கண்களில் பட்டு விடும். அதை தரிஸிக்காமல் இருப்பதே மிகவும் நல்லது.

-oooooOooooo-

ஸங்கீத மும்மூர்த்திகளில் ஒருவரான

ஸ்ரீ ஸ்யாமா சாஸ்திரிகளின் ஜயந்தி

23.04.2012 திங்கட்கிழமை

காந்தர்வ வேதமென்னும் ஸங்கீதத்தை ஸ்ரீ பகவானை ஆராதிக்க மட்டுமே உபயோகித்து, ஸாஸ்த்ரீய ஸங்கீதத்தையே [நாதத்தையே] பரப்ருஹ்மமாக பாவித்து, ஸங்கீத ஸாஸ்த்ர விதிகளைச் சிறிதளவும் மீறாமல், ஏராளமான கீர்த்தனைகள் இயற்றி, மஹானாக வாழ்ந்து, நிர்குண ப்ருஹ்மத்துடன் ஐக்யமான ஸங்கீத மும்மூர்த்திகளில் ஒருவரான ஸ்ரீ ஸ்யாமா ஸாஸ்திரிகளின் ஜயந்தியான சித்திரை மாதம் கிருத்திகா நக்ஷத்திரம் இன்று

அவரது கீர்த்தனைகளைப் பாடி, கேட்டு, ஆனந்தித்து ஸ்ரீ பகவானை நினைத்து நன்மையை அடைவோம்.     

சுபம்

24.04.2012 செவ்வாய்க்கிழமை 

அக்ஷய த்ருதீயை+

தர்ம கட தானம்+

தண்ணீர் பந்தல் .... உதக (ஜல) தானம்.

26.04.2012 வியாழக்கிழமை

@ ஸ்ரீ ஆதிசங்கரர் ஜயந்தி @

27.04.2012 வெள்ளிக்கிழமை

பகவான் ஸ்ரீ ராமானுஜர் ஜயந்தி

ஆகியவை பற்றி தனிப்பதிவுகள் 

ஓரிரு நாட்கள் முன்னதாக வெளியிடப்பட உள்ளன.

-oOo-

@”ஸ்ரீஆதி சங்கரரின் வாழ்வும் வாக்கும”@ 

என்ற தலைப்பில், 

பள்ளிச்சிறுவர்கள், 

இரண்டரை மணி நேரங்கள் 

பங்கேற்று நடிக்கும் வண்ணம். 

தமிழில் நாடகம் எழுதித்தரச் சொல்லி 

2007 ம் ஆண்டு போட்டியொன்று அறிவித்திருந்தார்கள்.

அந்தப் போட்டியில் பங்கேற்ற 

500க்கும் மேற்பட்ட படைப்புகளில்

நான் எழுதி அனுப்பிய நாடகம் ஒன்று 

அகில இந்திய அளவில் 

மூன்றாம் பரிசினை வென்றது. 

அந்த நாடகக்காட்சிகளை 

ஒரு சில பகுதிகளாகப் பிரித்து 

ஆதி சங்கர ஜயந்தியை முன்னிட்டு

தொடராக வெளியிடலாம் என எண்ணியுள்ளேன்.

-oOo-