VGK 04 / 02 / 03 ] SECOND PRIZE WINNERS ! “காதல் வங்கி”

’சிறுகதை விமர்சனப்போட்டி’ முடிவுகள்

கதையின்  தலைப்பு 

VGK 04 ]  ” காதல் வங்கி  ”

இணைப்பு:

http://gopu1949.blogspot.com/2014/02/vgk-04.html

மேற்படி 'சிறுகதை விமர்சனப்போட்டி'க்கு,

கணிசமான எண்ணிக்கையில் பலரும், 

மிகுந்த ஆர்வத்துடன் பங்குகொண்டு, 

வெகு அழகாக விமர்சனங்கள் 

எழுதியனுப்பி சிறப்பித்துள்ளனர். 

அவர்கள் அனைவருக்கும் என் 

மனமார்ந்த இனிய அன்பு நன்றிகள். 

நடுவர் அவர்களால் பரிசுக்குத் 

தேர்ந்தெடுக்கப்பட்டுள்ள 

விமர்சனங்கள் மொத்தம்:  

ஐந்து

இந்தப் பரிசுகளை வென்றுள்ள  ஐவருக்கும் 

நம் பாராட்டுக்கள் + மனம் நிறைந்த 


இனிய  நல்வாழ்த்துகள். 

   

மற்றவர்களுக்கு: 

    

இரண்டாம் பரிசினை 

வென்றுள்ளவர்கள்


மொத்தம் இருவர்:

 

திருமதி. ராஜலக்ஷ்மி பரமசிவம் அவர்கள்

வலைத்தளம்: “அரட்டை”

rajalakshmiparamasivam.blogspot.com

மற்றும்



திருமதி. கீதா மதிவாணன் அவர்கள்

வலைத்தளம் : ” கீதமஞ்சரி ”

geethamanjari.blogspot.in

இரண்டாம் பரிசினை வென்றுள்ள 

திருமதி. ராஜலக்ஷ்மி பரமசிவம் 


 அவர்களின் விமர்சனம்:

காதல்  என்பதே ஒரு மேஜிக் தானே!   மனிதர்களுக்குள் எத்தனை, எத்தனை ஜாலங்கள் செய்யக் கூடியது இந்த உணர்வு. அதைக் கருவாய் எடுத்துக் கொண்டு  அற்புதமாய் கதை சொல்லியிருக்கிறார் கோபு சார். இளம் வயதினர் அனைவரும் படிக்க வேண்டிய காதல் கதை தான் இது. 

கண்டதும் காதல் என்று சொல்லிக் கொண்டு, புறத் தோற்றத்தையும்,  நுனி நாக்கு ஆங்கிலத்தையும், வங்கி கணக்கையும்  பார்த்து வருவதல்ல காதல் என்பதையே 'வங்கிக் காதல் ' விளக்குகிறது... அது எங்கு எப்பொழுது வரும் என்றே தெரியாது என்பது ஜானகி, ரகுராமன் காதல் சொல்கிறது.  முதலில், இது என்ன பொருந்தாக் காதல் போல் தெரிகிறதே என்று நினைக்கத் தோன்றுகிறது. படிக்க படிக்க ரகுராமனின் உயர்ந்த குணங்கள் மட்டுமல்ல, அதைவிட உயர்ந்த குணங்கள் உடைய  ஜானகியே அவருக்கு உற்ற துணையாக வர வேண்டும் என்று தோன்ற ஆரம்பித்து விடுகிறது. 

ஜானகியின் நடை, உடை, பாவனைகளை ஆசிரியர் விவரிக்கும் போதே, ஜானகியுடன், நம் வீட்டுப் பெண்களை ஒப்பிட்டுப் பார்க்காமல் இருக்க முடியவில்லை. மனித இயல்பு தானே. அத்தனை உயர்ந்த, அழகுள்ள, கை நிறைய சம்பாதிக்கும்,  கலக்கலவெனப் பழகும்   ஜானகியை யாருக்குத் தான் பிடிக்காமல் போகும். ரகுராமன் ஜானகியிடம் தன உள்ளத்தைப் பறி கொடுத்ததில் ஆச்சர்யமென்ன! 

ரகுராமனும், ஜானகியின் குணநலன்களுக்கு, சற்றும் குறைந்தவரில்லை.  ஆனாலும் அவர்  படிப்பு  சற்றே நம்மை யோசிக்க வைக்கிறது. 

ஜானகிக்கு   வேண்டுமானால் அவர் மேல் காதல் என்று சொல்லலாம். அவள் தாய் , தன மகள்  படிப்பிற்கு ஏற்ற, நல்ல படித்த  கை நிறைய சம்பாதிக்கும்  மாப்பிள்ளை வேண்டும் என்று நினைத்திருந்தால்  அது சகஜமே.  

இதையெல்லாம் தாண்டி ஜானகியின் தாய், கலாசாரத்திற்கும், ஆன்மீகத்திற்கும், கொடுக்கும் மரியாதை, தாய், மகள் உரையாடலில் நன்கு விளங்குகிறது. இப்படிப்பட்ட  ஒரு நல்ல தோழியே தாயாய் அமைந்த விதத்தில், ஜானகி  கொடுத்து வைத்தவள் தான். 

கண்டதும் காதல்,  உடனே ரெஜிஸ்தர்  திருமணம் என்று பதை பதைக்காமல், நன்கு யோசித்து, தங்கள் பொருளாதார நிலைமை சீராக்கிக் கொண்டு திருமணம் செய்து கொண்ட இந்தத் தம்பதிகள், பல காதலர்களுக்கு ஒரு நல்ல முன்னுதாரணம்  என்று சொன்னால் மிகையாகாது என்றே நினைக்கிறேன். 

திருமணம்  முடிந்ததும், இருவரும் தங்கள், தங்கள் தொழிலை,  ஆர்வமாய் கவனிப்பது அவர்களுடைய முதிர்ச்சியைக் காட்டுகிறது.

 வில்லன் யாரும் வங்கிக் காதலுக்கு குறுக்கே வந்து நம்  இதயத்தை  படபடக்க வைத்து, பிபியை எகிற வைத்து ,  விடுவார்களோ என்ற பயம்  பாதிவரை இருந்தது. ஜானகியின் தாயின் உணர்வுகளை  ஆசிரியர் வில்லனாக்கி விடுவாரோ என்ற அச்சமிருந்தது உண்மை தான், ஆனால்  அந்தத் தடையும் சட சட வென்று  முறித்த காதாசிரியருக்கு நன்றி.  பின் பாதியில், இந்தத்  தம்பதிகள் திருமணம்  தடையில்லாமல் நடக்க வேண்டுமே என்ற வேண்டுதல்  மட்டுமே மிச்சம்  இருந்தது என்று சொல்ல, வேண்டும். 

திருமணத்தை  நடத்தி வைத்த கோபு சாருக்கு பாராட்டுக்கள்.  ஜானகி-ரகுராமன் தம்பதிக்கு வாழ்த்துக்களும், ஆசிகளும்.

ஒரு காதல் கதையை, எங்கும் முகம் சுளிக்கும்படியாக இல்லாமல், மிகவும் நாசுக்காக, அதே சமயத்தில், காதலின் சாரம்  முழுவதும்  இருக்கும் படியான கதையை சொல்லியிருப்பதற்கு,  நன்றிகள்  ஆசிரியருக்கு.

பாராட்டுக்கள் கோபு சார்.

 

மனம் நிறைந்த பாராட்டுக்கள் + 

இனிய நல்வாழ்த்துகள்.


    

இரண்டாம் பரிசினை வென்றுள்ள 

திருமதி. கீதா மதிவாணன் 


 அவர்களின் விமர்சனம்:

‘காதல் வங்கி’ என்னும் இச்சிறுகதை உருவான விதத்தை என் கற்பனையில் கொண்டுவந்து பார்க்க விழைகிறேன். உருவான சூழல் வங்கி என்பதை தலைப்பு யூகிக்கவைக்கிறது. ஆனால் எப்போது? எப்படி? இப்படியொரு சிந்தனையை வாசகர் உள்ளத்தில் கிளப்பியதற்காகவே கதாசிரியரைப் பாராட்டலாம்.

நாம் வங்கிக்குச் செல்கிறோம். அங்கே பணிபுரியும் ஒரு பெண் மடிசாரில் இருக்கிறாள். மடிசார் மட்டுமா? 

மடிசார் புடவையுடன், இரண்டு மூக்குகளிலும் வைர மூக்குத்திகள் ஜொலிக்க, காதுகள் இரண்டிலும் வைரத்தோடுகள் மின்ன, காலில் மெட்டிகள் அணிந்து, கைகள் இரண்டிலும் நிறைய தங்க வளையல்கள் அடுக்கிக்கொண்டு, தன் நீண்ட கூந்தலை ஒற்றைச்சடையாக குஞ்சலம் வைத்து பின்னிக்கொண்டு, உள்ளங்கைகளிலும், விரல்களிலும் பட்டுப்போல மருதாணி சிவக்க, முகத்திற்கு பசு மஞ்சள் பூசி, நெற்றியிலும், நடு வகிட்டிலும் குங்குமம இட்டுக்கொண்டு, தலை நிறைய புஷ்பங்கள் சூடி, வாயில் தாம்பூலம் தரித்து, கழுத்தில் புதிய மஞ்சள் கயிற்றுடன் திருமாங்கல்யம் தொங்க, கோயிலிலிருந்து புறப்பட்ட அம்மன் போலக்காட்சியளிக்கிறாள் என்று வைத்துக்கொள்வோம்.

முதலில் கொஞ்சம் திடுக்கிடலாய்த்தான் இருக்கும் நமக்கு. ஏனெனில் அட்ரா மாடர்ன் உடைகளை இளைஞர்கள் அதிலும் குறிப்பாக இளம்பெண்கள் விரும்பி அணிகிற இந்தக் காலத்தில்… நான்கு சுவருக்குள் பணிபுரியக்கூடிய ஏதேனும் அலுவலகம் என்றாலும் பரவாயில்லை, இப்படி பொதுமக்கள் புழங்கக்கூடிய ஒரு வங்கிக்கு இளம்வயதிலேயே பழம்பஞ்சாங்கம் போல் வருவதை யார்தான் விரும்புவார்கள்? ஆனாலும் ஒருத்தி வந்திருக்கிறாள். அவளைப் பார்த்தவுடன் நமக்கு என்ன தோன்றும்? 

வீட்டில் ஏதோ விசேஷம் போலிருக்கிறது. அதில் கலந்துகொண்டுவிட்டு பணிக்கு நேரமாகிவிட்டதால் அப்படியே வங்கிக்கு வந்துவிட்டிருப்பாள். வங்கி வந்ததும் மாற்றிக்கொள்ள கையில் வேறு புடவை எடுத்துவந்திருப்பாள், ஆனால் மாற்றிக்கொள்ள வசதிப் படாததால் அப்படியே வேலை செய்கிறாள் என்று நமக்குள் நாமே முடிவு செய்துகொள்வோம். ஆனால் கதாசிரியருக்கு கற்பனை வேறுவிதமாய் ஓடியிருக்கவேண்டும். அதையே ஒரு கதையாகவும் பரிணமிக்கச் செய்திருக்கவேண்டும் எனில் அவருடைய கற்பனாசக்திக்கான சான்று இது.

இப்படியும் யோசிக்கிறேன். வழக்கமாய் அவர் வங்கிக்குச் செல்லும்போதெல்லாம் அங்கு பணிபுரியும் ஜானகி போன்ற உற்சாகமான, சுறுசுறுப்பான, புன்னகை மாறா முகத்துடன், வாஞ்சையுடன் வரவேற்று உபசரித்து உதவும் ஒரு பெண்ணைப் பார்த்த மாத்திரத்தில் இந்தப் பதிவிரதைக்கேற்ற பர்த்தாவாக ஒரு நல்ல ஆம்படையான் கிடைத்தால் எவ்வளவு ஜோராக இருக்கும் என்ற ஆத்மார்த்த ஆசியும் விருப்பமும் இணைந்ததாகவும் இருக்கலாம். மொத்தத்தில் காதலர் தினம் கொண்டாடப்படும் இந்த வாரத்தில் மனத்துக்கு இதமானதொரு காதல் கதை. 

//அன்றே, அப்போதே, அங்கேயே ரகுராமனின் புதுக்கணக்கு ஒன்று ஜானகியிடம் தொடங்கப்பட்டு விட்டது. //

இந்த வரிகளில் தொணிக்கும் யுக்தியைக் கண்டு வியக்கிறேன். காதல் வங்கிக் கணக்கா, காசு வங்கிக் கணக்கா என்று யூகிக்க இடம் தரும் இடம் இது.

ஜானகியின் குணாதிசயம் எவ்வளவு நேர்த்தியாகச் சித்தரிக்கப்பட்டிருக்கிறதோ… அதைவிடவும் பன்மடங்கு மேலாக ரகுராமனின் அம்சங்கள் சித்தரிக்கப்பட்டுள்ளன. வேத சாஸ்திரங்களில் கரை கண்ட அளவுக்கு, லோக விஷயங்களில் அதிக ஆர்வமோ ருசியோ இல்லாதவரை, தன் வங்கியிலும் அரைக்கோடி சேர்க்கவைத்து, தன் மனத்திலும் காதல் டெபாசிட் செய்யவைத்தது ஜானகியின் சாதனைதான்..

இக்கதையின் சிறப்பாக தாய்க்கும் மகளுக்குமான சம்பாஷணைகள் வெகு அற்புதம் என்பேன். ஒரு தாய்க்கு இருக்கவேண்டிய எல்லா கவலைகளும் ஜானகியின் தாய்க்கு உள்ளது. மகள் எடுத்திருக்கும் முடிவு சரியானதுதான் என்று உள்மனம் ஆரவாரித்தாலும், இந்த முடிவில் அவள் உறுதியை அவள் வாயாலேயே அறிந்துகொள்ளச் செய்யும் தந்திரம் ரசிக்கவைக்கிறது.

தாயைப் பார்த்தே வளர்ந்திருக்கும் ஜானகிக்கு தாய் தந்தையின் புரிதலான வாழ்க்கையும், முறையான வளர்ப்பும் பாசமும், சரியான பாதையைத் தேர்ந்தெடுக்கும் தெளிவைத் தருகிறது. ஜானகியின் தாய்க்கு மகள் மேல் மாறாத நம்பிக்கையைக் கைக்கொள்ளச்செய்கிறது. காதல் வேகத்தில் முடிவெடுத்துவிட்டு பின்னாளில் மனம் மாறி மகள் மனத்தளவிலும் வேதனைப்படக்கூடாதே என்ற ஒரு சராசரி தாயின் பரிதவிப்பும் அவள் வார்த்தைகளில் வெளிப்படுகிறது. மகள் யோசித்திராத கோணங்களிலும் யோசித்து கேள்விகள் மூலம் மகளின் மனத்திடத்தை சோதித்து தாய் ஏற்றுக்கொள்வது மிகச் சிறப்பு. காதல் என்றதுமே என்ன ஏது யார் என்று கேட்காமல் தாம் தூம் என்று குதித்து எடுத்தவுடனேயே எதிர்ப்பைக் காட்டும் பெற்றோர், மனத்தில் கொள்ளவேண்டிய அம்சம் இது.

எல்லாச் சிறுகதைகளும் இறுதியில் ஒரு திருப்பத்தை நோக்கியே நம்மை செலுத்திப் பழக்கிவிட்டன. அப்பழக்கதோஷத்தாலோ என்னவோ இந்தக் கதையிலும் இறுதியில் ஒரு எதிர்பாரா திருப்பத்தை எதிர்பார்த்தே நகர்கிறது சராசரி வாசக மனம். ஜானகி மடிசார் கட்டி வங்கிப்பணிக்குச் செல்வது ஒரு திருப்பம் என்று சொல்லமுடியாதபடி ஜானகியின் அபூர்வ குணாதிசயம் நம்மைக் கட்டிப்போட்டுவிடுகிறது.

எல்லாமே திட்டமிட்டபடி செல்கிறது. சிறுகதைக்கான எந்தத் திருப்பத்தையும் கதாசிரியர் காட்டவில்லையே. ஏன்? ஏன்? இங்குதான் கதாசிரியரின் தேர்ந்த திறம் வெளிப்படுகிறது. திட்டமிட்ட சீரான, நேரான வாழ்க்கையில் அதிர்ச்சியூட்டும் எந்தத் திருப்பங்களையும் எதிர்கொள்ளவேண்டிய அவசியமில்லை என்பதையே இக்கதையை சுமுகமாக முடித்திருப்பதன் மூலம் கதாசிரியர் வாசகர்க்கு உணர்த்துவதாக நான் கண்டுகொள்கிறேன். சபாஷ்! ‘

காதல் வங்கி’ என ஈர்க்கும் தலைப்புக்கு இன்னொரு சபாஷ்!

 

மனம் நிறைந்த பாராட்டுக்கள் + 

இனிய நல்வாழ்த்துகள்.

     

மிகக்கடினமான இந்த வேலையை

சிரத்தையுடன் பரிசீலனை செய்து

நியாயமான தீர்ப்புகள் வழங்கியுள்ள 

நடுவர் அவர்களுக்கு என் நன்றிகள்.

நடுவர் அவர்களின் 

வழிகாட்டுதல்களின்படி

இரண்டாம் பரிசுக்கான தொகை 

இவ்விருவருக்கும் 

சரிசமமாக பிரித்து வழங்கப்பட உள்ளது.

 





இந்தப் போட்டியில் பரிசு பெற்றுள்ள


மற்றவர்கள்  பற்றிய விபரங்கள்


தனித்தனிப் பதிவுகளாக, 


பல மணி நேர  இடைவெளிகளில்


வெளியிடப்பட்டு வருகின்றன.



காணத்தவறாதீர்கள் !

அனைவரும் தொடர்ந்து

ஒவ்வொரு வாரப்போட்டியிலும் 

உற்சாகத்துடன் பங்கு கொண்டு 

சிறப்பிக்க வேண்டுமாய் 

அன்புடன் கேட்டுக்கொள்கிறேன்.

இந்த வார சிறுகதை விமர்சனப் 

போட்டிக்கான இணைப்பு: 

http://gopu1949.blogspot.in/2014/02/vgk-06.html

கதையின் தலைப்பு:

”உடம்பெல்லாம் உப்புச்சீடை !”

விமர்சனங்கள் வந்து சேர இறுதி நாள்:

வரும் வியாழக்கிழமை 


27.02.2014  


இந்திய நேரம் இரவு 8 மணிக்குள் 

என்றும் அன்புடன் தங்கள்

வை. கோபாலகிருஷ்ணன்