சொன்னதைச் சொல்லுமாம்...

நவராத்திரி முதல் நாள், என்

ஒன்றரை வயது அருமைப்

பேத்தியிடம் சொன்னேன்:

“கொலு பொம்மைகளைத்

தொடாமல் பார்க்கணும்” என்று!

அவள் அடுத்த பத்து நாட்களும்

அதையே திரும்பத் திரும்பச் சொன்னாள்

கொலு பார்க்க வந்த

பெரியவர்கள் அனைவரிடமும்.

புலிக்குக் கொடுத்த முத்தம் !

முதன் முதலாக

ஐந்தும் மூன்றும் எட்டு என்று

சரியாகச் சொன்ன

என் குழந்தையை

”கணக்கில் நீ ‘புலி’ “ என்று சொல்லி

முத்தம் கொடுத்துப் பாராட்டினேன்

”அப்பா ..... எனக்கொரு

சந்தேகம்” என்றது

”சந்தேகம் எதுவாகினும்

தயங்காமல் கேள்” என்றேன்

” ‘புலி’ க்கு கூட கணக்குப்

போடத் தெரியுமா?” என்றது.