6] ஆசையை அடக்க ஆசைப்படு.

2

ஸ்ரீராமஜயம்

வாய்ப்பந்தல் போடுவதாலோ, அரசியல், பொருளாதாரம், சமூக சீர்திருத்தம் என்பவற்றாலோ தேசிய ஒருமைப்பாடு ஏற்படவே ஏற்படாது. 

எல்லோரும் ஈசனின் குழந்தைகள் என்ற பக்தியினால் மட்டும் தான் மக்களை ஒன்று சேர்க்க முடியும். 

நாம் செய்யும் பாபத்திற்கு உடம்பு தண்டனை.

பாபத்திற்கு மூலம் கெட்டகாரியம்.

கெட்ட காரியத்திற்கு மூலம் ஆசை.

ஆகையால் நம் கஷ்டம் அனைத்திற்கும் மூல காரணமாகிய ஆசையைப் போக்கினால் தான், நிரந்தரமான துக்க நிவர்த்தி உண்டாகும்.

ஜாதியில் உயர்வுதாழ்வு நிச்சயமாக இல்லை. 

மஹான்களான அப்பர், நம்மாழ்வார், சேக்கிழார், நந்தனார், கண்ணப்பர் மாதிரியானவர்கள் எந்த ஜாதியிலும் தான் தோன்றியிருக்கிறார்கள்.

சொந்த ஆசை, துவேஷம் இல்லாதபோது, எந்த காரியம் செய்வதிலும் வெறுப்பு இராது.

oooooOooooo

அன்புடையீர்,

அனைவருக்கும் வணக்கம்.

05.06.2013 புதன்கிழமையன்று ஒரு நெருங்கிய சொந்தக்காரக் குழந்தையின் முதலாம் ஆண்டு ‘ஆயுஷ்ஹோமம்’ + 'காதுகுத்துதல்' நிகழ்ச்சிக்குச் சென்றிருந்தேன். 

அங்கு என்னிடம் பேசிக்கொண்டிருந்த உறவினர் ஒருவர், ”இந்தாங்கோ, இதைப் படித்துப் பாருங்கோ” என ஒரு ஆன்மிக மலரின் 17ம் பக்கத்தைச்  சுட்டிகாட்டினார். 

நானும் படித்தேன், மகிழ்ந்தேன். அவரிடம் நன்றிகூறி அந்த இதழைத் திரும்பக் கொடுக்கச்சென்றேன். ”அது உங்களிடம் தான் இருக்க வேண்டும், நீங்களே வைத்துக்கொள்ளுங்கள்” எனக்கூறிவிட்டார். அதில் உள்ள செய்தியினை அப்படியே கீழே கொடுத்துள்ளேன்:

’தினமலர்’ [மதுரை வெளியீடு]

ஆன்மிக மலர்’ 25.05.2013 பக்கம் 17ல் 

வெளியாகியுள்ளதோர் அதிஅற்புத நிகழ்ச்சி. 

-oOo-

”இதயக்கனி” 

இன்று வைகாசி அனுஷம். காஞ்சி மஹாபெரியவரின் ஜென்ம நக்ஷத்திரம். இதையொட்டி அவர் செய்த அதிஅற்புத நிகழ்ச்சி ஒன்றைக்கேளுங்கள்.

1986ல் ஒரு ஏகாதசி ஞாயிற்றுக்கிழமை. காஞ்சி சங்கர மடத்தில் ஸ்ரீ மஹாபெரியவா பக்தர்களுக்கு தரிஸனம் தந்து கொண்டிருந்தார்.

ஒரு ஓரத்தில், சுமார் ஐந்து வயது குழந்தையுடன் ஒரு பக்தர் அழுதபடியே நின்று கொண்டிருந்தார். அப்போது ஸ்ரீ மஹாபெரியவருடன், எப்போதும் கூடவே கைங்கர்யம் செய்துகொண்டிருக்கும், சந்திரமெளலி என்பவரும் திருச்சி. ஸ்ரீ.ஸ்ரீகண்டன் என்பவரும் இருந்தனர். 

ஸ்ரீ மஹாபெரியவா ஸ்ரீகண்டனை அழைத்து, “கையில் குழந்தையுடன் ஒருவர் அழுதுகொண்டிருக்கிறாரே! ஏன் அழுகிறார்? என்று விசாரி” என்றார்கள்.

ஸ்ரீகண்டனும், அவரிடம் சென்று அவரது கவலைக்கான காரணத்தை, ஸ்ரீ மஹா பெரியவா கேட்டு வரச்சொன்ன தகவலைத் தெரிவித்தார்.

“ஐயா, என் கையில் இருப்பது ஐந்து வயது பெண் குழந்தை. உடல்நிலை சரியில்லை. டாக்டரிடம் காண்பித்தேன். குழந்தைக்கு இருதயத்தில் துவாரம் இருக்கிறது. ஆபரேஷன் செய்ய வேண்டும், இருப்பினும் கொஞ்சம் சிரமம் தான் என்றும் அவர் சொல்லி விட்டார். ஆபரேஷனுக்கு தேதியும் குறித்தாயிற்று. 

நம் பெரியவாளிடம் குழந்தையைக் காண்பித்து, அவரிடம் சரணாகதி அடைந்து விட்டால், குழந்தை குணமாகி விடும் என நம்பி வந்துள்ளேன். ஒருவேளை என் குழந்தைக்கு ஆபத்து என்றால், ஆபரேஷன் செய்து அது இறப்பதைவிட, பெரியவரின் பாதார விந்தங்களை அது அடையட்டுமே என கருதுகிறேன்” என்றார்.

இந்த விஷயத்தை ஸ்ரீகண்டன் ஸ்ரீ மஹா பெரியவரிடம் தெரிவித்தார்.

ஸ்ரீ மஹா பெரியவா உடனே குழந்தையைக் கொண்டுவரும்படிச் சொன்னார்கள். அதை ஆசீர்வதித்தார்கள். 

அருகிலிருந்த சந்திரமெளலியிடம் ஓர் மாம்பழத்தைக் கொடுத்து, ”இதில் சிறு துண்டை நறுக்கி குழந்தைக்குக் கொடுக்கச்சொல், சரியாகிவிடும். ஆபரேஷன் தேவையிராது” என்று சொல்லி அந்த பக்தரை ஊருக்கு அனுப்பி விட்டார்கள். 

அதன்பின், தன் குழந்தையை டாக்டர் குறிப்பிட்ட நாளில் அழைத்துச் சென்றார் அந்தக்குழந்தையின் தந்தை. டாக்டர்கள் குழந்தையைப் பரிசோதித்தபோது, ஆச்சர்யம் அடைந்தனர். 

”இருதயத்தில் துவாரமா! இந்தக்குழந்தைக்கா!! இல்லையே!!!! ” என்றார்கள்.

“அன்று இருந்த துவாரம் இன்று மறைந்தது எப்படி?” என்று குழந்தையின் தந்தையிடம் கேட்டார்கள். நடந்ததை விளக்கினார் அந்தத்தந்தை.

டாக்டர்கள் ஆச்சர்யப்பட்டார்கள். பின், ஸ்ரீ மஹாபெரியவரிடம் வந்து நடந்ததைச்சொல்லி மகிழ்ச்சியுடன் ஆசிபெற்றுச் சென்றார்கள்.;

இதன்பின் 1994ல் மஹாபெரியவா முக்தியடைந்து விட்டார்கள்.  

2006ல் ஒரு வெள்ளிக்கிழமையன்று, ஒருவர் ஸ்ரீ மஹாபெரியவரின் அதிஷ்டானத்திற்கு [பிருந்தாவனத்திற்கு] வந்தார்.  

ஸ்ரீஸ்ரீஸ்ரீ மஹாபெரியவா அதிஷ்டானம்

[பிருந்தாவனம்]

அங்கு பூஜை செய்துகொண்டிருந்த சந்திரமெளலியிடம் திருமணப்பத்திரிகை ஒன்றைக்கொடுத்து,  ”ஸ்ரீ மஹா பெரியவாளின் அதிஷ்டானத்தில் அதை வைத்து, பிரஸாதம் தாருங்கள்” எனக்கேட்டார். 

சந்திரமெளலியும் அவருக்கு மாம்பழம், துளசி, கற்கண்டு கொடுத்தார், வந்தவர் கண்களில் கண்ணீர்.

“இவர் ஏன் அழுகின்றார்? ஒருவேளை புளிக்கிற மாம்பழத்தைக் கொடுத்து விட்டோம் என நினைத்து வருத்தப்படுகிறாரோ?” என சந்திரமெளலி நினைத்து, அவரிடமே காரணம் கேட்டார்.

“ஸ்வாமி, நினைவிருக்கிறதா? 20 ஆண்டுகளுக்கு முன் உங்களிடம் தான் ஸ்ரீ மஹாபெரியவா, ஒரு மாம்பழத்தைக் கொடுத்து, இருதய நோயால் பாதிக்கப்பட்ட என் மகளுக்குக் கொடுக்கச்சொல்லி குணமாக்கினார். 

அந்தக் குழந்தைக்குத்தான் இப்போது திருமணம்.  இன்றும் அதே போல மாம்பழத்தை நீங்கள் தருகிறீர்கள். இதை மஹாபெரியவா மீண்டும் உங்கள் மூலம் தரும் பிரஸாதம் என்றே நினைக்கிறேன். குழந்தையை ஆசீர்வதியுங்கள்” என்றார்.   

வாழும் தெய்வமான ஸ்ரீ மஹாபெரியவர் நம் அனைவரது  மனதிலும் ‘இதயக்கனி’யாக இன்றும் விளங்குகிறார்.

oooooOooooo

அன்புடையீர்,

அனைவருக்கும் மீண்டும் வணக்கம்.

இந்த என் தொடர்பதிவுக்கு அடிக்கடி வருகை தந்து தங்களின் மதிப்பு வாய்ந்த கருத்துக்களைப் பதிவு செய்து உற்சாகமூட்டிவரும் அனைவருக்கும் என் மனமார்ந்த இனிய நன்றிகள்.  

ஒவ்வொருவருக்கும், ஒவ்வொரு பதிவுக்கும், ஒவ்வொரு பின்னூட்டத்திற்கும், வழக்கம்போல பதில் தரவேண்டும் என நான் என் மனதில் நினைத்தும்கூட, அடுத்தடுத்து இந்தத் தொடர்பதிவின் பகுதிகளை வடிவமைக்க வேண்டிய வேலைகளில் நான் ஈடுபட வேண்டியிருப்பதால், அதுபோல என்னால் இந்த ஒரு தொடருக்கு மட்டும், அவ்வப்போது பதில் அளிக்க இயலவில்லை.  

இந்தத்தொடர் மேலும் எவ்வளவு நாட்களுக்கு என்னால் தொடர்ந்து வெளியிடப் பிராப்தம் இருக்கும் என்பது எனக்கே தெரியாத விஷயமாக உள்ளது.  

ஸ்ரீஸ்ரீஸ்ரீமஹாபெரியவா அவர்கள் என்ன நினைத்துக் கொண்டிருக்கிறாரோ? இது விஷயத்தில் அவர்களின் அனுக்ரஹம் எனக்குத் தொடரும்வரை, இந்தத்தொடர் தொடர்ந்து கொண்டே இருக்கும் என்பதை மட்டும் இப்போது அடியேன் தங்களுக்குத்  தெரிவித்துக்கொள்கிறேன்.

மேலும், ஸ்ரீஸ்ரீஸ்ரீ மஹாபெரியவாளின் அனுக்ரஹ அமுதம் சம்பந்தமான இந்த என் தொடரினைத் தொடர்ந்து பார்க்கவும், படிக்கவும், கருத்துச்சொல்லவும், அனுக்ரஹ அமுத மழையில் நனையவும், உண்மையிலேயே ஓர் கொடுப்பினை வேண்டும் என நான் உறுதியாக நம்புகிறேன். 

அந்தக் கொடுப்பினை எல்லோருக்கும்,  எப்போதும் இருக்கும் என்று சொல்ல முடியாதுதான்.  அதனால் நான் யாரையும் ”இந்த என் பதிவுகளுக்கு தொடர்ந்து வருகை தாருங்கள், கருத்துச்சொல்லுங்கள்” என கேட்டுக்கொள்ளவில்லை. விருப்பமுள்ளவர்கள், ருசியுள்ளவர்கள் அவர்களாகவே முன்வந்து கருத்தளித்தால் மகிழ்ச்சியடைவேன்.

இருப்பினும் அவ்வப்போது வருகை தந்து கருத்தளித்துள்ளவர்கள் பற்றிய புள்ளிவிபரங்கள் மட்டும் சேகரித்துக்கொண்டுதான் இருக்கிறேன். அவர்கள் அனைவருக்கும், இந்தத் தொடர்பதிவு முடிந்தபிறகு, தனியொரு பதிவினில் நன்றி கூறிக்கொள்வேன்.  

என்றும் அன்புடன் தங்கள்

வை. கோபாலகிருஷ்ணன்

-oOo-

ஸ்ரீஸ்ரீஸ்ரீ மஹாபெரியவாளின் 

 ’அமுத மழை ’

தொடர்ந்து பொழியும்

[இதன் தொடர்ச்சி 09.06.2013 ஞாயிறு வெளியாகும்]