நேயர் கடிதம் - ரவிஜி ரவி [மாயவரத்தான் எம்.ஜி.ஆர்.]

வாத்தியாருக்கு ஒரு மனம் திறந்த 

நேய(ர்) மடல்!!

 

மார்ச் மாத வாக்கில இப்புடி ஒரு போட்டி இருக்குன்னு வாத்தியாரு மெயில் அனுப்பியிருந்தாரு. படிச்ச சூட்டோட அத மறந்தே பொயிட்டேன்.

மப்புல மல்லாந்து கெடந்தவன் திடீர்னு அஞ்சாறு பேரு ஓடுறத பாத்துட்டு என்னா விஷயம் பாக்கலாம்னு எந்திரிச்சு ஓடுறது மாதிரி, போன மாசம் காத்தாட வாத்யாரோட வலைப்பக்கமா போனப்ப கொஞ்சம் பேரு ஓட்டமா ஓடி பின்னூட்டம் போட்டு முடிச்சுட்டாங்கன்னு தெரிஞ்சது. எல்லாம் எட்டாவது எண்ட் - ரவுண்டு ஓடுறப்ப நான் மொதல் ரவுண்டயே தொடலயே என்ன பண்ணாம்னு யோசிச்சு, வடிவேலு மாதிரி ‘சரி…போய்த்தான் பாப்போம்னு கெளம்புனேன். 

அங்கதான் மறுபடியும் வாத்யாரோட டச்ச பாத்தேன். ஒவ்வொரு இடுகைக்குமான இணைப்பினை மாதவாரியாகக் கொடுத்து, ஒவ்வொரு மாத பின்னூட்டம் முடிஞ்சதும் கவுன்ட், பெர்சென்டேஜோட  ஒரு அப்டேட் கொடுத்து, முடிச்சதும் கன்கிராஜுலேஷன்ஸ் மெஸேஜும் கொடுத்து… சரியான ஊக்குவிப்புத் திலகம்!!! இடைல மிஸ்ஸிங் இருந்தாக்க அதையும் உடனுக்குடன் சுட்டிக்காட்டி, ராத்திரி ஒரு மணிவரைக்கும் ஆன் – லைன்தான். இல்லாட்டி இந்த நத்தையையும்கூட  கெலிக்க வக்கமுடியுமா???

கெளம்புன பின்னாலதான் தெரியுது அப்டி ஓடுலன்னாக்க என்னென்ன விஷயங்கள மிஸ் பண்ணியிருப்போம்னு!! கவிதைகள், வெரைட்டியான நான் படிக்காமல் விட்டுப்போன சிறுகதைகள், புகைப்படங்கள், துணுக்குகள் இத்யாதி இத்யாதி… மாடு கன்ன மேச்ச மாதிரியும் ஆச்சு, தம்பிக்கு பொண்ணு பாத்தமாதிரியும் ஆச்சுங்குறாப்புல – போட்டியுலயும் கலந்துகிட்டதால ஆயிரம்பொன்னோட அருமையான வாசிப்பு அனுபவமும் ஏகத்துக்கு கிடச்சது.

மொதல்ல சொல்லணும்னா ஜாதி, மத, இன, மொழி, நிற பாகுபாடுகளைக் கடந்த மகான் காஞ்சி மாமுனிவரைப்பத்தி 108 எபிசோட் படிக்க வச்சதுதான். சிலிர்க்கச் செய்த அனுபவம். பல நேரங்களில் நாமே நேரில் இருந்து காட்சிகளைப் பார்ப்பதுபோல காட்சிப்படுத்திய எழுத்துநடை.

அடுத்தது அழவைக்கும், சிரிக்கவைக்கும், சிந்திக்கவைக்கும், சமுதாய அவலங்களின்மேல் கோபம்கொள்ளச்செய்யும் சிறுகதைகள். ஒவ்வொன்றும் ஒவ்வொரு ரகம். 

அடுத்தது பயணக்கட்டுரைகள். எங்கிட்ட பாஸ்போர்ட்டே இதுவரைக்கும் இல்ல. ஆனா என்னை விசாவும் இல்லாம துபாய்க்கே கூட்டிகிட்டு போயிட்டுவந்த வாத்யாரை என்ன சொல்றது? புகைப்படம், புள்ளிவிவரம் எல்லாத்தையும் கலக்கி உன்னத பயண அனுபவத்தை அள்ளித்தந்த துபாய் பயணக் கட்டுரைகள்.

அவர் பெற்ற பரிசுகள், விருதுகள் பற்றிய குறிப்புகள் படிப்பவரை வெற்றியின் பாதையில் உந்தித் தள்ளும் என்றால் அது மிகையில்லை.  இது பத்தாதுன்னு பதிவர் சந்திப்பு குறித்த பதிவுகள். பகிர்ந்துகொண்ட மகிழ்ச்சிக்கணங்கள், புகைப்படங்கள். அதுலயும் அவங்க வாங்கிவந்த ஸ்வீட், கிஃப்ட் முதற்கொண்டு அவங்களோட சேர்ந்து எடுத்துகிட்ட புகைப்படங்கள் எல்லாத்தோடயும் ஒரு பாராட்டு.  வாத்யார இத்தனபேரு கொண்டாடுறாங்கன்னா அது ஒண்ணும் சும்மா இல்ல.

எதையும் பின்-பாயின்ட் பண்ணி ஊட்டமளிக்கும்கருத்துகளை ஒவ்வொரு வலைப்பூவுக்கும் வந்து வாரிவழங்கும் வாத்தியாரோட படைப்புகளுக்கு பின்னூட்டம் இடுவது எனக்கு கிடைத்த மாபெரும் வாய்ப்புதான். ஆயிரம் ரூபாய் பரிசு – கொஞ்சம் பெருசுதான். ஆனா வாத்யாரு சைஸைபோல மனசும் - பெருசுதான். அதெல்லாம் சரி நீ இன்னாடா வாத்த்யாருக்கு சின்னபுள்ளத்தனமா இப்புடி ஒரு ஸ்லாங்குல கடுதாசி எழுதுறயேன்னு கேக்குறீங்களா?வாத்யாருன்னாலே - சின்னபுள்ளைங்கள ரொம்ம்ம்பப் புடிக்கும்க. டேய் - நீயும் ‘எங்க வீட்டுப் பிள்ளை’ன்னு அவர சொல்லவைக்கணும். அதான்ங்க இப்புடி.       

‘கோப்பெருஞ்சோழன் – பிசிராந்தையார் நட்பைப்போல இந்த வை.’கோ’ப்பெருஞ்சோழனார்  – இந்த ‘பிசிர்’ அடிக்கும் ஆந்தையார் நட்பும். எப்புடீ? என்னா மெர்ஸலாயிட்டீங்களா? ‘ஆயிரத்தில் ஒருவன்’ - வாத்யார் வாரித்தந்த ஆயிரம் ரூபாய ஜாலியா செலவு பண்ணப்போறேன். அதனால வுடு ஜூட்டு. இத்தோட நான் அப்பீட்டு.  ரொம்ம்ம்ம்ம்ம்ம்ப தாங்க்ஸ் வாத்யாரே. அடுத்த போ(பொ)ட்டில பாப்போம். வர்ட்டா?!!!

என்றென்றும் அன்புடன்,

உங்கள் – எம்ஜிஆர்.

ரவிஜி ரவி

http://mayavarathanmgr.blogspot.in/

oooooooooooooooooooooooooooooooo

தங்களின் தனிப் பாணியில் 
எழுதி அனுப்பியுள்ள
நகைச்சுவையான
நேயர் கடிதத்திற்கு
என் நன்றிகள்
வாத்யாரே !

அன்புடன் VGK

oooooooooooooooooooooooooooooooo

மற்ற சாதனையாளர்கள் பற்றிய செய்திகள்

இனியும் அவ்வப்போது தொடரும்

வெற்றியாளர்கள் பற்றிய ஒட்டுமொத்தச் செய்திகள் 

இறுதியில் தனிப்பதிவாகவும் வெளியிடப்படும். 

என்றும் அன்புடன் தங்கள்

(வை. கோபாலகிருஷ்ணன்)