வெண்ணிலவைத்தொட்டு ....... முத்தமிட ஆசை ! மிளகாய்ப்பொடி கொஞ்சம் ....... தொட்டுக்கொள்ள ஆசை !!

இட்லி / தோசைக்குத் 
தொட்டுக்கொள்ளும் 
காரசாரமான 
மிளகாய்ப்பொடி

By வை. கோபாலகிருஷ்ணன்

இட்லி, தோசை, அடை போன்ற சிற்றுண்டிகள் செய்த பிறகு அவற்றிற்கு தொட்டுக்கொள்ள வேண்டி தேங்காய்ச்சட்னி, தக்காளி காரச்சட்னி, வெங்காய சாம்பார் போன்றவைகள் ஏதாவது செய்ய வேண்டியுள்ளது. 

அதுபோல சப்பாத்தி செய்தால் ஏதாவது ஒரு கூட்டு,  தால், குருமா சென்னா போன்ற ஏதாவது ஒன்றும், பூரி செய்தால் மஸாலும் தொட்டுக்கொள்ள வேண்டி தனியே செய்ய வேண்டியுள்ளது.

இந்தத்தொட்டுக்கொள்ள என செய்யப்படும் பதார்த்தங்கள் செய்ய தனித்தனியே சில பொருட்கள் தேவைப்படுவதுடன், அதைப் பொறுமையாகச் செய்ய நேரமும் ஒதுக்க வேண்டியுள்ளது.

இதுபோல அவ்வபோது சிற்றுண்டிகள் செய்யும் போது, தொட்டுக்கொள்ள வேண்டி தனியே ஒன்று கஷ்டப்பட்டு செய்வதைத்தவிர்க்க, இரண்டு அல்லது மூன்று  மாதங்களுக்கு ஒருமுறை காரசாரமான “தோசை மிளகாய்ப்பொடி” என்பதை செய்து வைத்துக்கொண்டால், செளகர்யமாக இருக்கும். 

முறைப்படி பக்குவமாக செய்யப்படும் ’தோசை மிளகாய்ப்பொடி’, நீண்ட நாட்கள் கெடாமலும் இருக்கும்.  வாய்க்கும் எள்ளின் வாசனையுடன் மிகுந்த சுவையாகவும், ருசியோ ருசியாகவும் இருக்கும். 

எண்ணெயில் குழைத்த இந்த காரசாரமான மணம் மிகுந்த ’தோசை மிளகாய்ப்பொடி’ தொட்டுக்கொள்ள இருந்தால், இட்லியோ தோசையோ வாய்க்கு அலுத்துப்போகாமல், மேலும் இரண்டு தின்னலாம் போல ஓர் பேரெழுச்சியை ஏற்படுத்தும்.

 

பயணம் செல்வோர்,  மிளகாய்ப்பொடி + எண்ணெய் நன்றாகக் குழைத்த கலவையில், மிருதுவான இட்லிகளை இரண்டு பக்கமும் நன்றாகப் பதித்து தோய்த்து,  பார்ஸலாக எடுத்துச்சென்றால், நன்றாக அவை ஸ்பாஞ்ச் போல ஊறிக்கொண்டு மிகுந்த சுவையாக இருக்கும்.  

 

காரம் அதிகம் தேவைப்படாதவர்கள் ஒருசில இட்லிகளை மட்டும் மிளகாய்ப்பொடி தடவாமல் எடுத்துச்செல்ல வேண்டும். கூடவே கொஞ்சம் சர்க்கரையையும் எடுத்துச்செல்லலாம். 

காரம் அதிகம் தேவைப்படுபவர்கள், இட்லியின் இருபுறமும் தடவியது போக, தனியாகக் கொஞ்சம் மிளகாய்ப்பொடி + எண்ணெய் எடுத்துச்செல்வது பயணத்திற்கு மிகவும் ஏற்றது.      

அடிக்கடி வெறும் இட்லியை தின்று தின்று அலுத்துப்போனவர்களுக்கு, இதுபோன்ற மிளகாய்ப்பொடி + எண்ணெய்க்கலவையில் தோய்த்து ஊறவைத்த இட்லியை, சாப்பிட்டுப்பார்த்தால் மட்டுமே, அதிலுள்ள சுவர்க்கலோக சுகம் என்னவென்று தெரியவரும்.

இட்லிக்கு மட்டுமல்ல, தோசை, அடை, சப்பாத்தி, பூரி போன்ற எல்லா சிற்றுண்டிகளுக்குமே, தொட்டுக்கொள்ள இந்த மிளகாய்ப்பொடி என்பதன் ஜோடிப்பொருத்தம்  மிகவும் சிறப்பாக சுவையாக மணமாக இருக்கக்கூடும். 

இதைச் செய்வதும் எளிது. ஒருமுறை மட்டும் செய்து வைத்துக்கொண்டால், நீண்ட நாட்கள் சுமார் 2-3 மாதங்கள் ஆனாலும் கெடாமல் அப்படியே இருக்கும்.

அன்றாடம் தொட்டுக்கொள்ள என்று வேறு ஒரு சட்னியோ, சாம்பாரோ, கூட்டோ, மஸாலோ, குருமாவோ, சென்னாவோ செய்ய வேண்டிய தொல்லை இருக்காது 

இப்போது மிளகாய்ப்பொடி தயாரிக்கத் தேவையான பொருட்கள் பற்றிச் சொல்கிறேன். 

1] மிளகாய் வற்றல் 150 கிராம் 
    [காம்புகளை நீக்கி விடவும்]

2] கடலைப்பருப்பு    100 கிராம்

3] உடைத்த வெள்ளை 
    உளுத்தம்பருப்பு   100 கிராம்

4] வெள்ளை எள்ளு  150 கிராம்

5] கட்டிப்பெருங்காயம் 20 கிராம்

6] தரமான சமையல் எண்ணெய் 50 முதல் 100  கிராம் வரை

7] உப்பு  5 சிறிய ஸ்பூன் அளவு மட்டும் 

செய்முறை:

1] வறுத்தல்: 

வாணலியில் எண்ணெயை  ஊற்றி அடுப்பில் ஏற்றி கொதிக்க விடவும். எண்ணெய் நன்கு காய்ந்ததும் அதில் பெருங்காயக் கட்டியைப்போட்டு, துளைகள் உள்ள நீண்ட கரண்டியால் அதை அப்படியே புரட்டிப்புரட்டி விடவும். நன்கு பொறிந்து எலந்தவடை போல வரும் போது எடுத்துத்தனியே ஒரு தட்டில் வைத்துக்கொள்ளவும்.

அடுப்பை சிம்ரனில் வைத்து [அதாவது அடுப்பை சிம்மில் ரன் செய்து] அதே எண்ணெயில், கொஞ்சம் கொஞ்சமாக மிளகாய் வற்றலை வறுத்து எடுத்து தனியாக ஒரு பாத்திரத்தில் சேமித்துக்கொள்ளவும். மிளகாய் வறுக்கப்பட வேண்டும் ஆனால் சிவப்பு நிறம் மாறி , கறுத்துக் கருகிப்போய்விடக்கூடாது.  

அடுத்ததாக [மிளகாய் வறுத்தபின் வாணலியில் உள்ள எண்ணெய் முழுவதையும் வடித்து விட்டு, துணியால் துடைத்துவிட்டு] எண்ணெய் ஏதும் இல்லாத காலியான வாணலியில் கடலைப்பருப்பையும் உளுத்தம்பருப்பையும் நன்கு சிவக்க வறுத்துக்கொள்ளவும்.  

அதே போல சுத்தமான வெள்ளை எள்ளையும் தனியே வறுத்துக்கொள்ளவும். கடலைப்பருப்பு, உளுத்தம் பருப்பு, எள்ளு இவை சிவக்க வறுபட்டால் போதும். ஆனால் எதுவுமே ஒரேயடியாக கருகிவிடக்கூடாது. 

[கல் + மண் இல்லாத சுத்தமான வெள்ளை எள்ளோ அல்லது கருப்பு எள்ளோ பயன் படுத்தலாம். அது போல சுத்தமானதாகக் கிடைக்காவிட்டால், கிடைத்த எள்ளை நன்கு கழுவிவிட்டு, களைந்து விட்டு, துணியில் வடிகட்டிப் பிழிந்து விட்டு, அதன் பிறகு அவற்றைத் வறுத்துக்கொள்ளலாம். ]

எண்ணெயில் வறுக்கப்பட்ட மிளகாய்வற்றல் 

எண்ணெயில் வறுத்த மிளகாய் வற்றல் +

எண்ணெய் இல்லாமல் வறுக்கப்பட்ட

இருவித பருப்புகள் + வெள்ளை எள்ளு

வறுக்கப்பட்ட 

கடலைப்பருப்பு + உளுத்தம்பருப்பு

வறுக்கப்பட்ட வெள்ளை எள்ளு +

எண்ணெயில் பொறிக்கப்பட்ட பெருங்காயம்

2] அரைத்தல்:

A] 

வறுத்து வைத்துள்ள மிளகாய் வற்றலுடன் உப்பைச்சேர்த்து, மிக்ஸி ஜாரில் போட்டு நன்றாக பொடியாகும் வரை மிக்ஸியில் அரைத்துக்கொள்ளவும். அந்த மிளகாய் வற்றல் + உப்பு சேர்ந்த கலவைப் பொடியினை தனியே எடுத்து வைக்கவும்.

B] 

இப்போது வறுத்து வைத்துள்ள கடலைப்பருப்பு + உளுத்தம்பருப்பு + எள்ளு + எலந்தவடை போல பொறிந்துள்ள பெருங்காயம் இவற்றை, கொஞ்சம் கொஞ்சமாக மிக்ஸி ஜாரில் போட்டு, சற்றே கைக்கு நறநறப்பாக இருக்குமாறு அரைத்துக்கொள்ளவும்.  

அதாவது வறுத்த இரண்டு பருப்புக்கள், பொறித்த பெருங்காயம், வறுத்த எள்ளு  எல்லாமே அரைகுறையாக மிக்ஸியால் அரைக்கப்பட்டிருந்தால் போதுமானது. மிகவும் நைஸ் ஆக பவுடராக அரைபட வேண்டியது இல்லை.

  

இப்போது அரைத்து வைத்துள்ள [A] and [B] கலவைகளை ஒன்றாகச் சேர்த்து, ஈரம் படாமல் ஒரு சுத்தமான பாட்டிலில் போட்டு இறுக்கி மூடி வைத்தால், முடிந்தது வேலை.

[மேலும் கொஞ்சம் உப்பு தேவைப்படுபவர்கள் அவ்வப்போது ஒரு சிட்டிகை உப்பையும் இந்த தோசை மிளகாய்ப்பொடியுடன்  சேர்த்துக்கொள்ளலாம்.]

வீட்டில் சிறிய குழந்தைகள் இருக்கிறார்கள் என்றால், மேலே கூறியுள்ள [A] + [B] கலவையை ஒன்றாக சேர்த்துக் கலக்கும் முன்பு, [B] கலவை அதிகமாகவும்  [A] கலவையைக் கொஞ்சமாகவும் தனியே எடுத்துக் கலந்து வைத்துக்கொண்டு, குழந்தைகளுக்கென்று   தனியாக பரிமாறலாம். 

10 வயதுக்கு உட்பட்ட குழந்தைகள் இருப்பார்களேயானால் A : B கலவையை 1 : 5  என்ற விகிதத்தில் கலந்து குழந்தைகளுக்கென்று தனியாக வேறு ஒரு பாட்டிலில் போட்டு வைத்துக்கொள்ளவும். [அதாவது சின்னக்குழந்தைகளுக்கு அதிக காரம் வேண்டாம் என்பதற்காக]

பெரியவர்களுக்கு A : B கலவை சரிக்குச்சரி 1 : 1  என்ற விகிதத்திலேயே கலந்து வைத்துக்கொள்ளலாம். அதுதான் வாய்க்கு நல்ல விறுவிறுப்பாக காரசாரமாக இருக்கும்.  எண்ணெயுடன் குழைத்து சாப்பிடுவதால் நல்ல மணமாகவும் இருக்கும்.

பெரும்பாலான குழந்தைகள் இந்தப்பொடியை இட்லிக்குத் தோய்த்து சாப்பிட மிகவும் விரும்புவது உண்டு. எங்கள் வீட்டுக்குழந்தைகள், பேரன் பேத்தி போன்றவர்கள், 2 அல்லது 3 வயதிலிருந்தே, வெறும் இட்லி + சர்க்கரை + தயிர் என்றால் விரும்பி சாப்பிடவே வர மாட்டார்கள். 

”இட்லி, பொடி, ஆயில்” தரட்டுமா என்றால் உடனே ஓடி வந்து சாப்பிட உட்காருவார்கள். 

அவர்களுக்காகவே காரம் குறைவாக பருப்பு மேலிட தனி மிளகாய்ப்பொடி கலந்து வைத்து விடுவது உண்டு.

அவ்வப்போது  டிபன் ஐட்டம்ஸ்களுக்கு, ஒரிரு ஸ்பூன் எடுத்துப்போட்டு, எண்ணெயைக்கொஞ்சம் விட்டு குழைத்துக் கொண்டு, இட்லி தோசையுடன் தொட்டுக்கொண்டு  சாப்பிட வேண்டியது தான். சூப்பராக சுவையாக இருக்கும்.

 

oooooOooooo

பின்குறிப்பு

என் வீட்டில் தயாரிக்கும் தோசை மிளகாய்ப்பொடி பற்றிய செய்முறை விளக்கம் அளிக்குமாறு, இதுவரை பலர் தங்கள் பின்னூட்டங்கள் மூலமும் மெயில் மூலமும் என்னை வற்புருத்தி வந்துள்ளனர். 

இதோ ஒருசிலரின் வேண்டுகோள்கள்:

[1]

http://gopu1949.blogspot.in/2011/03/blog-post_26.html

padma hari nandanMarch 27, 2011 at 2:46 PM

தோசைமிளகாய்ப்பொடி ரெஸிபி 

போஸ்ட் செய்ய மாட்டீர்களா?

[2]

http://gopu1949.blogspot.in/2011/03/blog-post_26.html

Pattu RajOctober 30, 2012 at 6:43 AM

ஒர் உதவி வேண்டும் சார்! 

தோசை மிளகாய் பொடி, 

உங்கள் வீட்டு ஸ்பெஷல் ரெசிபி, 

எப்போது பதிவிட உத்தேசம். ? 

[3]

http://gopu1949.blogspot.in/2012/12/blog-post_14.html

கணேஷ்December 14, 2012 at 10:03 PM

அடையைப் பற்றிய ஒவ்வொரு வரியும் 

அட அட என வியத்தகு வண்ணம் உள்ளது.

அடை மொழியுடன் கூடிய வர்ணனை
தங்களிடம் அடைக்கலம் ஆகி விட்டது .

அடைப் புளித்தால் ருசி.
உங்கள் எழுத்து புளிக்காமலேயே தனி ருசி.

மிளகாய் பொடியுடன் கூடிய படம்

ஒன்று இணைக்கவும்.

அவர்களுக்காகவே இந்த என் விறுவிறுப்பான காரசாரமான பதிவு இப்போது வெளியிடப்பட்டுள்ளது. 

oooooOooooo


ஓர் முக்கிய அறிவிப்பு

”பொக்கிஷம்” 

என்ற தலைப்பில்
தொடர்பதிவு எழுத 
இதுவரை என்னை இருவர்
அழைத்துள்ளனர்.

அந்த என் பதிவு
வரும் 15.03.2013 
வெள்ளிக்கிழமையன்று 
வெளியிடப்பட உள்ளது.

என்றும் அன்புடன் தங்கள்,
வை. கோபாலகிருஷ்ணன்