2] பிள்ளைகள் கொடுத்துள்ள ஒருசில அன்புத்தொல்லைகள்!

”பொக்கிஷம்”

தொடர்பதிவு 

By

வை. கோபாலகிருஷ்ணன்

-oOo-

பொதுவாகக் குழந்தைகள் என்றாலே இன்பம்!

அதுவும் நமக்குப்பிறந்த குழந்தைகள் என்றால், 
அது பேரின்பம்!!

அதுவே நம் குழந்தைகளுக்குப் பிறந்த 
குழந்தைகள் என்றால் 
அதுதான் உச்சக்கட்ட இன்பம்!!!

“மழலைகள் உலகம் மகத்தானது”
என்ற தலைப்பில் நான் எழுதியுள்ள சிறப்புக் கட்டுரையைப்படிக்க இணைப்பு இதோ: 
http://gopu1949.blogspot.com/2011/11/blog-post_4556.html 

 

                             

பொக்கிஷமான என் அருமை பேத்தி பவித்ரா  

மற்றும் பேரன்கள் ஷிவா + அநிருத் 

நம் தாய், தந்தை, வாழ்க்கைத்துணை, மக்கட்செல்வங்கள், பேரன் பேத்திகள், உடன் பிறந்தவர்கள், நெருங்கிய நண்பர்கள் என அனைவருமே நமக்குள்ள பொக்கிஷங்கள் தான். 

வலையுலகின் மூலம் இன்று நமக்குக்கிடைத்துள்ள முகம் தெரியா நட்புக்களும் மாபெரும் பொக்கிஷங்களே.

நன்றாக யோசித்துப்பார்த்தால், நம் குழந்தைகளே நமக்கு இறைவன் அளித்துள்ள மிகச்சிறந்த பொக்கிஷங்கள் என்றும் சொல்லலாம் !

நம் வாழ்க்கையில் நம்மால் நிறைவேற்றப்பட முடியாத ஒருசில ஆசைகளும், சாதனைகளும், விட்டகுறை தொட்டகுறைகளும், நம் மக்கட்செல்வங்களால் நிச்சயமாக நிறைவேற்றப்படும்.  

அந்த நம் பிள்ளைகள், நம்மைப்பிரிந்து எந்த நாட்டில் எந்த ஊரில் இருந்தாலும் செளகர்யமாக, செளக்யமாக, சந்தோஷமாக இருந்தால் போதும்; அவ்வப்போது தொடர்புகொண்டு, ’நல்லா இருக்கிறோம்’ என்று சொன்னாலே போதும் என்று நினைப்பவன் நான். வேறு எதுவும் அவர்களிடமிருந்து எதிர்பார்ப்பவன் அல்ல. 

இருப்பினும் நாம் பணமாகக்கொடுத்தால் இவர் நிச்சயமாக வாங்கிக்கொள்ளவே மாட்டார், என்பதை நன்கு உணர்ந்த என் பிள்ளைகள் ஒருசில பொருட்களை எனக்கு பிரியமாகக் கொடுத்துள்ளனர்.

என் கைக்குழந்தை [வயது 30] எனக்கு நான்கு ஆண்டுகளுக்கு முன்பு வாங்கிக்கொடுத்துள்ள 'ACER' மடிக்கணனி + 'NOKIA' கைபேசி இதோ:

 

இந்த என் பிள்ளை பெங்களூரில் வேலை பார்த்த நாட்களில்

அடிக்கடி வாங்கி வரும் KUNDA என்ற திரட்டுப்பால் இதோ:

இது எனக்கு மிகவும் பிடிக்கும்.

அழகாக சுருள்சுருளாக நல்ல சிவந்த நிறமாக 

கையில் ஒட்டாதபடி, முறுகலாக 

சூப்பரான சுவையுடன் மிகவும் ருசியாக இருக்கும்.

எனக்கென்று மட்டும் பிரத்யேகமாக 

ஒரு டப்பா ஒவ்வொரு முறையும் 

நான் தனியாக வாங்கி வைத்துக்கொள்வேன்.

-oooooo-

என் பெரிய பிள்ளையும் மருமகளும், பேரன் பேத்தியும் வெளிநாட்டில் இருப்பவர்கள். வருடம் ஒருமுறை இங்கு வந்து செல்வார்கள். அவர்கள் இங்கு வந்து செல்லும் போதெல்லாம் விட்டுச்செல்லும் பொருட்கள் ஏராளம். 

சிலவற்றை என்ன செய்ய வேண்டும் எப்படிப் பயன்படுத்த வேண்டும் என்பதே எங்களுக்குத் தெரியாமல் இருக்கும்.  

ஒவ்வொரு முறையும் அவ்விடமிருந்து புறப்பட்டு வரும்போது "என்ன வாங்கி வரட்டும்" என அன்புடன் கேட்பார்கள்.  

பெரும்பாலும் நான் ”ஒன்றுமே வேண்டாம். நீங்களும் குழந்தைகளும் நல்லபடியாக இங்கு வந்து விட்டுச்சென்றால் அதுவே போதும்” எனச்சொல்லி விடுவேன். அப்படியும் ஏதாவது புதுமையாக சிலவற்றை அன்புடன் வாங்கி வருவார்கள்.   

இங்கு நாங்கள் அன்றாடம் பயன்படுத்தும் காய்கறி வெட்டும் கத்திகள் முதல் கேமராக்கள் வரை பல பொருட்கள் அவர்களால் வாங்கிவந்து இங்கு விட்டுச்செல்லப்பட்டவைகளே. 

வீட்டில் உள்ள ஒவ்வொரு பொருட்களை நாங்கள் கையாளும் போதும் அவர்களையும் குழந்தைகளையும் கொஞ்சமும் மறக்கவே முடியாதபடி ஒவ்வொன்றிலும் தங்களின் முத்திரையைப் பதித்துள்ளார்கள். 

எதுவும் அளவுக்கு மிஞ்சினால் அவஸ்தை தானே. வீட்டில் வைக்கவும் இடமில்லாமல், விட்டெறியவும் மனமில்லாமல், பயன் படுத்தவும் தெரியாமல் தர்ம சங்கடப்பட வேண்டிவரும். 

அதனால் இப்போதெல்லாம் மிகவும் ஸ்ட்ரிக்ட் ஆகவே சொல்லியுள்ளேன். ”நான் கேட்காமல் எந்தப்பொருளும் வாங்கி வந்து இங்கு குவிக்கக்கூடாது” என்று.

ஏற்கனவே இங்கு வந்து சேர்ந்துள்ள ஒருசில பொருட்களில் மிகவும் பயனுள்ள பொருட்களாக நான் நினைப்பது  இதோ இங்கே:

ரத்தத்தில் கலந்துள்ள சர்க்கரை அளவை 

நாமே கண்டுபிடிக்க உதவும் கருவி

தொலைகாட்சிப்பெட்டி

புதிய கைபேசி

PANASONIC 'LUMIX' CAMERA

EMERGENCY CHARGEABLE LAMP

POWERFUL CHARGEABLE TORCH LIGHT

மேற்படி பொருட்களைவிட 

அவர்கள் ஒவ்வொரு முறையும் வாங்கி வருவதில் 

எனக்கு மிகவும் பிடித்தமான தின்பண்டம்

PRINGLES எனப்படும் உருளைகிழங்கு சிப்ஸ்.

அதை எப்படித்தான் அழகாக ஸ்டைலாக 

ஒரே மாதிரியாக வடிவமைத்துத் 

தயாரிக்கிறார்களோ என வியந்து கொண்டே 

சாப்பிடுவது வழக்கம்.

இது தயாரிக்கப்படும் தொழிற்சாலையில் 

ஏதாவது ஒரு உத்யோகம் கிடைத்தால் 

எப்படியிருக்கும் என நான் எனக்குள்

கற்பனை செய்து பார்த்து மகிழ்வதுண்டு

நானும் என் மனைவியும் முதன்முதலாக [SEPTEMBER / OCTOBER  2004]

விமானப்பயணம் அதுவும் வெளிநாட்டுப்பயணம் மேற்கொண்ட விமான டிக்கெட்டுகள் மற்றும் எங்களின் பாஸ்போர்ட் இன்றும் பொக்கிஷமாக. 

-oooooOooooo-

பின் குறிப்பாக ஒரு குட்டியூண்டு கதை:

ஓர் மனநோய்க்காப்பகத்திற்கு நிறைய நன்கொடை அளிப்பதற்காக ஓர் பிரபலம் செல்கிறார். அந்தக் காப்பகம் செயல்படும் விதத்தை அறிந்துகொள்ள, ஒருசில நோயாளிகளையும் நேரில் சந்தித்துப்பார்க்க வேண்டி, தலைமை மருத்துவர் ஒருவருடன் ஒவ்வொரு அறைக்காகச் செல்கிறார்.  

முதல் அறையில் ஓர் இளைஞன் சோகத்தில் அமர்ந்த நிலையில் ஏதோ ஓர் சுவற்றின் மூலையை வெறித்துப் பார்த்துக் கொண்டிருக்கிறான். 

“இவன் இந்த நிலைமைக்கு வந்த காரணம் என்ன?” என தலைமை மருத்துவரை அந்த பிரபலம்  கேட்கிறார், 

“இவன் மிகவும் அழகான ஓர் பெண்ணை உயிருக்கு உயிராகக் காதலித்துள்ளான். ஆனால் இவன் காதல் நிறைவேறவில்லை. அதிலிருந்து இப்படி ஆகிவிட்டான்” என்கிறார் மருத்துவர்.

பிறகு பல்வேறு நோயாளிகளைப்பற்றி ஓரளவு அந்த மருத்துவர் மூலம் அறிந்து கொண்ட அந்தப்பிரபலம், கடைசியாக மற்றொரு இளைஞனை சந்திக்க நேரிடுகிறது. 

“இவனுக்கு என்ன ஆச்சு? இவனுக்கும் ஏதாவது காதலில் தோல்வியா?” எனக் கேட்கிறார், அந்தப்பிரபலம்.

”இல்லை இல்லை. இவனுக்குக் காதலில் தோல்வியெல்லாம் இல்லை. இவன் யாரையும் காதலிக்கவும் இல்லை. ஆனால் அவன் காதலித்த அதே மிகவும் அழகான பெண்ணை தான் இவன் திருமணம் செய்துகொண்டான். அவளைத் திருமணம் செய்து கொண்ட பிறகே இப்படி ஆகிவிட்டான்” என்றார் அந்த மருத்துவர்.

அதாவது முதலாவது இளைஞன், தான் பொக்கிஷமாக தன் மனதில் நினைத்த தன் காதலியை, வாழ்க்கையில் கைநழுவவிட்டு, அவளை இழந்த சோகத்தினால் மட்டுமே இந்த நிலைமைக்கு வந்துள்ளான்.

அதே பொக்கிஷம் தனக்கு சுலபமாகக் கிடைத்தும், அதை முறைப்படி பயன்படுத்தி, அனுபவிக்கக்கொடுத்து வைக்காமல்,  இந்தப் பரிதாப நிலையை அடைந்துள்ளான் அந்த இரண்டாவது இளைஞன். 

இதிலிருந்து என்ன தெரிகிறது என்றால், நான் இந்தப் பொக்கிஷத் தொடரின் முதல் பகுதியில்  http://gopu1949.blogspot.in/2013/03/1.html சொல்லியுள்ளது போலவே, எனக்குப் பொக்கிஷமாகத் தோன்றுபவையெல்லாம் உங்களுக்கும் பொக்கிஷமாகத் தோன்றும் என நான் நினைக்கவே முடியாது. 

பொக்கிஷங்கள் அவரவர் பார்வையில், எண்ணங்களில், உணர்வுகளில், மதிப்பினில் வேறுபடக்கூடியவைகளே! 

இருந்தாலும் நான் இந்த என் ”பொக்கிஷம்” என்ற தொடரைத் மேலும் தொடரத்தான் போகிறேன். 

மீண்டும் இதன் அடுத்த பகுதியில் நாம் சந்திப்போம்..

.  

தொடரும்

இந்தப் பொக்கிஷப் பதிவின் தொடர்ச்சி 

24.03.2013 ஞாயிறு வெளியிடப்படும்

என்றும் அன்புடன் தங்கள்

வை. கோபாலகிருஷ்ணன்