27] மறைந்திருக்கும் ’மறை’

2

ஸ்ரீராமஜயம்

இறைவனும் குருவும் வேறில்லை. இறைவனே தன்னைக் காட்டிக் கொடுக்கிற ரூபத்தில் குருவாக இருக்கிறான். இப்படி நம்பி ஒருவரை குருவாக வரித்துவிட்டால் பலன் நிச்சயம்.

எழுத்து அதைப்படித்து மூளைக்குப் புரிகிற அர்த்தம் - இவைகளோடு வேதம் முடிந்துபோய் விடுவது இல்லை. பெரிய பெரிய அனுபவங்களைத் தரும் சக்தி அதனுடைய எழுத்து வடிவத்திற்குள்ளேயே இருக்கிறது. அதை உள்ளே வைத்துக்கொண்டிருக்கும் ”மறை”யாக அது இருக்கிறது.

எல்லா சமயங்களும் கடவுள் ஒருவரே என்று சொல்லுகின்றன. ஒருவரேயான அந்தக்கடவுள் எந்த சமயத்தின் மூலம் வழிபட்டாலும் அதை ஏற்றுக்கொள்ளத்தான் செய்வார். 

எனவே எவருமே தங்கள் பிறந்த மதத்தை விட்டு இன்னொரு மதத்தை தழுவ வேண்டியதில்லை.

oooooOooooo

அற்புத நிகழ்வுகள் 

வில்வ இலைகளை 

வைத்து விட்டுப்போனது யார்?

மஹாஸ்வாமிகளை உருக வைத்த நிகழ்ச்சி.

[பகுதி-1  படிக்க:  http://gopu1949.blogspot.in/2013/07/21.html  ]

[பகுதி-2  படிக்க:  http://gopu1949.blogspot.in/2013/07/22.html  ]     

[பகுதி-3  படிக்க:  http://gopu1949.blogspot.in/2013/07/23.html  ]   

[பகுதி-4  படிக்க:  http://gopu1949.blogspot.in/2013/07/24.html ]   

[பகுதி-5 படிக்க:   http://gopu1949.blogspot.in/2013/07/26.html ] 

பகுதி 6  of  9

”எனக்கு சொந்த ஊரு மதுர பக்கத்ல உள்ள உசிலம்ப்பட்டிங்க. நா பொறந்த ரண்டு வருசத்துக்குள்ள ஒடம்பு சரியில்லாம எங்கம்மா எறந்துட்டாங்க. 

அதுலேருந்து எங்கப்பாதான் என்னய வளர்த்துனாரு. எனக்கு ஆறு வயசாகும்போது என்ன கூட்டிக்கிட்டு பொளப்பு தேடி இந்தப்பக்கம் வந்தாரு. 

இந்த ஊரு ஜமீன்ல மாடு மேச்சு பராமரிக்கற வேலை கெடச்சிச்சுங்க. 

நா படிக்க பள்ளிக்கூடம் போவலீங்க. எங்கப்பாருட்ட நெறயா படிச்சிருக்கேன். எங்கப்பாருக்கு பாட்டுன்னா உசிரு. 

புரந்தரதாசரு .... திருவையாறு தியாகராஜசாமி பாட்டெல்லாம் ரொம்ப நல்லா பாடுவாரு. எனக்கும் சொல்லி வெச்சிருக்காரு. நானும் பாடுவேன். 

அந்த ஆசையிலதான் என் பெயரைப் ’புரந்தரகேசவலு’ன்னு வெச்சிருக்காரு. இப்ப அவரு இல்லீங்க. மோட்சத்துக்கு போய் ரண்டு வருசம் ஆயிடிச்சி.  

நா இப்ப ஜமீன் மாடுங்களை மேச்சுப் பராமரிக்கிறேன். ஜமீன்ல சோறு போட்டு சம்பளம் தர்றாங்க. 

இப்ப எனக்குப் பன்னண்டு வயசாவுது சாமி...”

இதைக்கேட்டு நெகிழ்ந்தார் ஸ்வாமிகள். 

“அது சரி ..... ‘இந்த சுத்து வட்டாரத்லேயே வில்வ மரம் இல்லே’னு எல்லாரும் சொல்றச்சே ஒனக்கு மட்டுமெங்கேருந்து இவ்வளவு பில்வம் கெடச்சுது?” என்றார் ஆச்சர்யத்தோடு.

புரந்தரகேசவலு பவ்யமாகச் சொன்னான்: “இங்கருந்து மூணு மைல் தள்ளிருக்கற மலை அடிவாரத்தில நெறயா புல்லு மண்டிக் கெடக்குது சாமி. 

அங்கதான் எங்கப்பாரு காலத்துலேருந்து மாடு மேய்க்கப் போவோம். 

அங்க மூணு பெரிய வில்வ மரங்கள் இருக்குது! 

அப்போ எங்கப்பாரு அந்த எலைங்கள பறிச்சாந்து காட்டி, ‘எலே புரந்தரா ....  இந்த எலை பேரு வில்வம். இதால சிவபெருமானுக்கு பூஜை பண்ணுனா அம்புட்டு விசேஷம்டா ... பாத்து வெச்சுக்கடா’ன்னு சொன்னாரு. அது நெனப்லய இருந்துச்சு சாமி. 

முந்தா நாளு நம்ம மடத்துக்காரவங்க இந்த எலையக்காட்டி, ‘நெறைய வேணும்’னு கேட்டப்ப புரிஞ்சு போச்சு .... ஓடிப்போயி ஓலக்குடயிலே பறிச்சாந்து வெச்சேன் .... மாடு மேய்க்கற பையன் கொண்ணாந்ததுனு தெரிஞ்சா பூஜைக்கு ஏத்துக்க மாட்டீங்களோனு பயந்துதான் யாருக்கும் தெரியாம வெச்சிட்டுப்போனேன். இதான் சாமி சத்தியம்!”

மேலும் நெகிழ்ந்த ஆச்சார்யாள் சற்று நேரம் மெளனம் காத்தார். 

பிறகு, “புரந்தரகேசவலு .... ஒனக்கு என்ன வேணும் .... என்ன ஆசைன்னு சொல்லு. அத மடத்லேர்ந்து பூர்த்தி பண்ணச் சொல்றேன்!” என்றார் வாஞ்சையுடன்.

உடனே புரந்தரகேசவலு, “சிவ ... சிவா!” என்று சொல்லி கன்னத்தில் போட்டுக்கொண்டு, மேலும் பேச ஆரம்பித்தான்: 

தொடரும்......

oooooOooooo

18.07.2013 பேத்தி ’பவித்ரா’வின் பிறந்த நாள்

திருச்சி ’பவித்ராலயா’ இல்லத்தில் 

கொண்டாடப்பட்டது. 

இதோ சில படங்கள் தங்கள் பார்வைக்காக!

   

என் பேத்தியால்  எடுக்கப்பட்ட  போட்டோ [கீழே]

நேற்று இரவே திருச்சியிலிருந்து கிளம்பி 

சிங்கப்பூருக்கு ஓரிரு வார இன்பச்சுற்றுலா சென்றுள்ள 

’பவித்ரா’ செல்லத்திற்கு மனமார்ந்த இனிய நல்வாழ்த்துகள்.

oooooOooooo

தேடினேன் ...... வந்தது !

நாடினேன் ........ தந்தது !!

வாசலில் ........ நின்றது !!!

வாழவா ....... என்றது !!!!

பெரும்பாலான நபர்களுக்கு தாங்கள் விரும்பிடும் கல்வியைக் கற்க வாய்ப்புக் கிட்டுவது இல்லை.

அதுபோல தாங்கள் விரும்பிடும் வேலை வாய்ப்புகள் அனைவருக்குமே அமைந்து விடுவதும் இல்லை. 

பெரும்பாலானோர்,  தாங்கள் படித்த படிப்புக்கு தகுந்த வேலைகளிலும் அமர்ந்து விடுவதும் இல்லை. 

படித்த படிப்பு ஒன்று, செய்யும் வேலை மற்றொன்று. பெரும்பாலும் இதற்கும் அதற்கும் சம்பந்தா சம்பந்தமே இருப்பது இல்லை. 

’யுவராணி’ படித்த படிப்பு முதுகலை கணிப்பொறி பயன்பாட்டியல். இவர் படித்து முடித்துள்ள படிப்புக்கு ஏற்ற வேலையொன்றுக்கும் காம்பஸ் செலெக்‌ஷனில் ஒரு நிறுவனத்தால் தேர்வாகியுள்ளார். 

வேலைவாய்ப்புக்கான நியமன  உத்தரவை அந்த நிறுவனத்திலிருந்து எதிர்பார்த்துக் காத்திருந்து வந்துள்ளார்.

இருந்தும், இவருக்கு வங்கியொன்றில் பணியாற்ற வேண்டும் என்பதே ஆரம்பத்திலிருந்து விருப்பமாக இருந்து வந்துள்ளது.

அதற்கான முயற்சிகளில் யுவராணி தொடர்ந்து ஈடுபட்டும் வந்துள்ளார். 

செல்வி யுவராணி தமிழரசன் அவர்களுக்கு அவர் ஆழ்மனத்தில் துளிர் விட்டிருந்த ஆசைப்படியே, நாட்டுடமை ஆக்கப்பட்டுள்ள வங்கியொன்றில் பணியாற்றும் வாய்ப்பு இப்போது கிடைத்துள்ளது.

15.07.2013 திங்கட்கிழமை இரவு 8 மணிக்கு APPOINTMENT ORDER + POSTING ORDER வழங்கப்பட்டுள்ளது.

அதுவும் தமிழ்நாட்டிலேயே, மிகவும் தொழில் வளர்ச்சியடைந்த மிகப்பெரியதொரு மாவட்டத்தின் தலைநகரில் [HEART OF THE CITY] அமைந்துள்ள வங்கிக்கிளையில் POSTING கிடைத்துள்ளது.

இதைப்பற்றிய மேலும் சில விபரங்களை, அவரே அவரின் வலைத்தளத்தில், என்றாவது ஒருநாள் பதிவாக வெளியிடுவார். 

மனதளவில் மிகவும் சோர்வடைந்திருந்த யுவராணிக்கு என்னால் என் கடிதங்களால் கொஞ்சம், தன்னம்பிக்கையையும், மனோதைர்யமும் மட்டும் அளித்து அவ்வப்போது உற்சாகமும் ஆறுதலும் தர முடிந்தது.

ஒரு பாசமுள்ள தந்தையாக, பிரியமுள்ள அண்ணனாக, கீதை சொன்னக்கண்ணனாக,  நலம் விரும்பும் நண்பனாக என்னைப் பல்வேறு கோணங்களிலும் வைத்துப்பார்த்து, பெரிதும் மகிழ்ச்சி கொள்கிறாள், யுவராணி. 

இன்றைய உலக நடைமுறை யதார்த்தங்களை எடுத்துச்சொல்லி, ஒருசில ஆலோசனைகளையும், வழிகாட்டுதல்களையும் மனம் விட்டுப் பகிர்ந்து, என்னால் யுவராணிக்குப் புரியும்படி சொல்லிக்கொடுக்க முடிந்தது.

“சொல்லிக்கொடுத்த வார்த்தைகளும், கட்டிக்கொடுத்தச் சோறும் [பயணம் செய்வோருக்கு] எவ்வளவு நாட்களுக்கு உபயோகமாக இருக்க முடியும்?" என்று ஓர் பழமொழி சொல்லுவார்கள்.

யுவராணி தன் விடா முயற்சியினாலும், கடும் உழைப்பினாலும், தனது முதுநிலைப் பட்டப்படிப்பினாலும், தனித்திறமைகளாலும் மட்டுமே இன்று இந்த வங்கிப்பணிக்குத் தேர்வாகி இருக்கிறாள் என்பதே உண்மை.

இருப்பினும், “வங்கிப்பணிக்கான எழுத்துத்தேர்வுகள் + நேர்முகத் தேர்வுகளில் அடுத்தடுத்து ஏற்பட்ட சிறு தோல்விகளால் துவண்டு போயிருந்த எனக்கு, அவ்வப்போது ஊக்கமும் உற்சாகமும் அளித்துக்கொண்டே இருந்த தாங்கள் தான் இந்த என் வெற்றிக்கு முழுக் காரணகர்த்தா” என்று அவ்வப்போது சொல்லிச் சொல்லிப் பூரித்துப் போகிறாள், யுவராணி.

இதுவரை நானும் யுவராணியும் ஒருவரையொருவர் நேருக்கு நேர் சந்திக்கும் சந்தர்ப்பம் கிடைக்காவிட்டாலும், மிகவும் முக்கியமான, அதிக அன்பும் பாசமும் நிறைந்த, என் வலையுலக நட்புக்களில் [PEN FRIENDS' VERY CLOSE CIRCLE] யுவராணியும் ஒருவராகத் திகழ்ந்து வருகிறார். 

தங்கள் விருப்பப்படியே அடியேனால் ஆசீர்வதித்துக்

 கொடுக்கப்பட்டுள்ள பேனாக்களுடன்

 வங்கிப்பணியில் சேர உள்ள  

தங்களுக்கு என் மனமார்ந்த 

இனிய நல்வாழ்த்துகள்

யுவராணி.

இறையருளாலும், ஸ்ரீஸ்ரீஸ்ரீ மஹாபெரியவா அனுக்ரஹத்தாலும், தங்களுக்கு, 

தங்களின் அலுவலகப்பணிகளிலும், சொந்த வாழ்க்கையிலும், மேலும் 

தொடர்ந்து பல வெற்றிகள் கிடைக்க மனதாரப் பிரார்த்திக்கிறேன். 

அன்புடன் கோபு 

ஸ்ரீஸ்ரீஸ்ரீ மஹாபெரியவாளின் 

 ’அமுத மழை ’

தொடர்ந்து பொழியும்

இதன் தொடர்ச்சி 
21.07.2013 ஞாயிறு வெளியாகும்

என்றும் அன்புடன் தங்கள்

வை. கோபாலகிருஷ்ணன்