9] "நானும் என் அம்பாளும் !" .............. அதிசய நிகழ்வு !

”பொக்கிஷம்”

தொடர்பதிவு 

By

வை. கோபாலகிருஷ்ணன்

-oOo-

                                                                          

ஸ்ரீ ஸ்ரீ ஸ்ரீ மஹா ஸ்வாமிகளுடன் எனக்கு ஏற்பட்டுள்ள அனுபவங்கள் ஏராளமாக உள்ளன. எவ்வளவோ MIRACLES நிகழ்ந்துள்ளன. 

இதுவரை அவ்வாறான என் அனுபவங்கள் எதையும் நான் யாரிடமும் பகிரங்கமாகப் பகிர்ந்து கொண்டது இல்லை. 

எனக்கு மட்டுமல்ல. தரிஸனத்திற்குச் சென்று வந்த எவ்வளவோ பக்தர்களுக்கு அவர்களின் அருளால் எவ்வளவோ மறக்க முடியாத நிகழ்ச்சிகள் நடைபெற்றுள்ளன.

இவ்வாறான பலரின் சுகானுபவங்களையெல்லாம் தொகுத்து ‘கவிஞர் நெல்லை பாலு’ என்பவர் 1995 இல் “தெய்வ தரிஸனம்” என்ற தலைப்பினில் ஸ்ரீ பரமாச்சார்யார் ஸ்வாமிகளின் முதலாண்டு நினைவஞ்சலிக்காக ஓர் சிறப்பு நூல் வெளியிட்டிருந்தார்கள். 

அந்த நூலில் ஸ்ரீ ஸ்வாமிகளுடனான தங்களின் அனுபவங்களை பலரும் பகிர்ந்து கொண்டுள்ளார்கள்.  அதில் முன்னாள் இந்திய ஜனாதிபதி [PRESIDENT OF INDIA] திரு. ஆர். வெங்கட்ராமன்  அவர்களில் ஆரம்பித்து நூற்றுக்கணக்கான பிரபலங்கள் எழுதியுள்ள அனுபவக் கட்டுரைகள் இடம்பெற்றுள்ளன.

அடியேன் எழுதியதோர் அனுபவமும் அதில் பக்கம் எண்கள்: 155-157 இல் 

இடம் பெற்றுள்ளது. அந்தப் புத்தகத்தை இன்றும் நான் மிக உயர்ந்த 

பொக்கிஷமாக என்னிடம் வைத்துள்ளேன். 

நான் அந்த புத்தகத்தில் எழுதியுள்ள பகுதியை மட்டும் இங்கு கீழே

பகிர்ந்து கொள்ள விரும்புகிறேன். 

கோவிலில் மாட்டு ....

பரமாச்சாரியார் உத்தரவு

By V. கோபாலகிருஷ்ணன் BHEL திருச்சி.


-oOo-

1978-ம் வருஷம், விநாயகர் சதுர்த்திக்கு முதல் நாள். அடியேன் என் 

குடும்பத்தாருடன் ஸ்ரீஸ்ரீஸ்ரீ மஹா ஸ்வாமிகளை தரிஸிக்கச் 

சென்றிருந்தேன்.

அதுசமயம் ஸ்ரீஸ்ரீஸ்ரீ பரமாச்சார்யாள் அவர்கள், குண்டக்கல் ரெயில்வே

ஸ்டேஷனுக்கு அருகேயுள்ள ‘ஹகரி’ என்ற சிற்றூரில், ஹகரி ரெயில்வே 

ஸ்டேஷனை ஒட்டி அமைந்துள்ள “பண்யம் சிமிண்ட் ஃபேக்டரி” 

வளாகத்தில் முகாமிட்டு சாதுர்மாஸ்ய விரதம் அனுஷ்டித்து வந்தார்கள்.

அங்கு ஸ்ரீஸ்ரீஸ்ரீ மஹாபெரியவா ஆக்ஞைப்படி மிகவும் துரிதமாக ஓர் 

சிவன் கோயில் கட்டப்பட்டு முடியும் தருவாயில் இருந்தது.

வழக்கப்படி நான், என் தாயார், என் மனைவி என் முதல் இரு குழந்தைகள் [வயது முறையே 4-1/2 மற்றும் 3] தரிஸனத்திற்குச் சென்றிருந்தோம். 

எனக்குப் படம் வரைவதில் சிறுவயது முதற்கொண்டே ஆர்வம் உண்டு. என் கையால் நானே சிரத்தையாக வரைந்து வர்ணம் தீட்டி மிகப்பெரிய அளவில் ஒரு காஞ்சி காமாக்ஷி அம்மன் ஓவியத்தை அட்டை மடங்காமல் வெகு ஜாக்கிரதையாகச் சுற்றி எடுத்துச்சென்றிருந்தேன்.

நாங்கள் அங்கு போய்ச்சேர்ந்தபோது மாலை சுமார் 4 மணி இருக்கும்.

சுமார் 100 பக்தர்கள் மட்டுமே ஸ்ரீ பெரியவா தரிஸனம் செய்து கொண்டிருந்தார்கள். அதிகமாகக் கூட்டம் இல்லாத நேரம்.

ஸ்ரீ மஹா பெரியவாளை நெருங்கி நாங்கள் நான்கு நமஸ்காரங்கள் செய்து விட்டு, கொண்டு சென்ற ஸ்ரீ காமாக்ஷி அம்மன் படத்தை பழத்தட்டுடன் சமர்ப்பித்தோம். 

அருகில் உதவியாளர்களாக இருந்த **’ராயபுரம் ஸ்ரீ பாலு’** அவர்களும், **’திருச்சி ஸ்ரீ. ஸ்ரீகண்டன்’** அவர்களும் ஸ்ரீ பெரியவாளிடம் படத்தைப் பிரித்துக் காட்டினார்கள்.

[** இவர்கள் இருவரையும் பற்றி கீழே தனியே எழுதியுள்ள்ளேன் ** ]

அதை தன் திருக்கரங்களால் வாங்கிக்கொண்ட ஸ்ரீ மஹா பெரியவா அவர்கள், தன் திருக்கரங்கள் இரண்டையும் அந்தப்படத்தில் நன்றாக ஊன்றிய வண்ணம், கீழே தரையில் அமர்ந்த நிலையில், வெகு நேரம் சுமார் 10-15 நிமிடங்கள் நன்றாக ஊன்றிப்பார்த்து, மிகவும் ரஸித்து, சந்தோஷத்துடன் புன்னகை புரிந்தார்கள்.

நான் அந்தக்காட்சியைக்கண்டு மெய்சிலிர்த்துப்போய் ஸ்தம்பித்து நின்று கொண்டிருந்தேன். பிறகு தன் உதவியாளர்களிடம் ஏதோ சில விபரங்கள் என்னைப்பற்றி கேட்டது போல உணர்ந்து கொண்டேன். 

பிறகு அங்கு கூடியிருந்த பக்தர்களில் சிலர், “ஸ்ரீ மஹா பெரியவா திரும்பவும் காஞ்சீபுரத்திற்கே வந்து விட வேண்டும். ஸ்ரீ மஹா பெரியவாளை அழைக்கவே ஸ்ரீ காமாக்ஷி அம்மன் இங்கு இப்போது வந்திருக்கிறாள்” என்று தங்கள் ஆசையை மிகவும் பெளவ்யமாக வெளிப்படுத்தினார்கள். ஸ்ரீ மஹா பெரியவாளும் சிரித்துக்கொண்டார்கள்.

ஸ்ரீ மஹாபெரியவா தமிழ்நாட்டிலிருந்து புறப்பட்டு வட இந்திய பாத யாத்திரை மேற்கொண்டு, சுமார் 8 ஆண்டுகளுக்கும் மேலாகி, தமிழ்நாட்டுப்பக்கம் எப்போ திரும்பி வருவாரோ என பக்தர்களை ஏங்க வைத்திருந்த காலக்கட்டம் அது. 

நான் வரைந்து எடுத்துச்சென்ற படத்தை அனுக்கிரஹம் செய்து திரும்பத் தந்து விடுவார்கள், அதை ஃப்ரேம் செய்து நம் கிருஹத்தில் பூஜையில் வைத்துக்கொள்ள வேண்டும் என்று நினைத்திருந்த எனக்கு, மேலும் ஓர் இன்ப அதிர்ச்சி அங்கு காத்திருந்தது.

ஸ்ரீ மஹாபெரியவா யாரோ ஒருவரை குறிப்பாக அழைத்து வரச்சொல்லியிருந்தார்கள். வந்தவர் அந்த பண்யம் சிமிண்ட் ஃபேக்டரியின் மிக உயர்ந்த அதிகாரியோ அல்லது மேனேஜிங் டைரக்டரோ என்று நினைக்கிறேன்.

அவர், பஞ்சக்கச்சத்துடன், உத்திரியத்தை இடுப்பில் சுற்றிக்கொண்டு, மேலாடை ஏதும் அணியாமல், மிகவும் பெளவ்யமாக வந்து, ஸ்ரீ மஹாபெரியவாளை நமஸ்காரம் செய்து கொண்டார்.  

அவரிடம் மேற்படி படத்தை ஒப்படைத்து பெரியதாக FRAME செய்து, அங்கு கட்டப்பட்டு முடியும் தருவாயில் உள்ள சிவன் கோயிலில் மாட்டிவிடும் படி ஆக்ஞை செய்தார்கள்.

எனக்கு ஒரு 9 x 5 வேஷ்டியும், என் மனைவிக்கு 9 கெஜம் நூல் புடவையும், என் தாயாருக்கு குளிருக்குப் போர்த்திக்கொள்ளும் சால்வையும், என் குழந்தைகள் இருவருக்கும் பழங்கள் + கல்கண்டு + குங்குமப்பிரஸாதம் போன்றவைகளையும் ஒரு மூங்கில் தட்டில் வைத்து, ஸ்ரீ மஹாபெரியவா நன்றாக ஆசீர்வதித்து அனுக்கிரஹம் செய்து கொடுத்தார்கள். அனைவரும் நமஸ்கரித்து விட்டுவாங்கிக்கண்களில் ஒத்திக்கொண்டோம்.

மறுநாள் விடியற்காலை, விநாயக சதுர்த்திக்காக, அந்த ஊர் கலைஞர் ஒருவரால் மிகப்பெரிய விநாயகர் சிலை களிமண்ணால் வெகு அழகாகச் கையினாலேயே வடிவமைக்கப்பட்டு, செய்யப்பட்டதை அருகில் நின்று கவனிக்கும் பாக்யம் பெற்றேன்.  

விநாயக சதுர்த்தி பூஜை ஸ்ரீ மஹாபெரியவா சந்நிதானத்திலேயே மிகச்சிறப்பாக நடைபெற்றதை நேரில் காணும் பாக்யம் பெற்றோம்.

இந்த நிகழ்ச்சிகள் என் வாழ்நாளில் என்றும் மறக்கவே முடியாத ஒரு நல்ல பேரின்ப அனுபவம் ஆகும்.

[அனுபவக் கட்டுரை இத்துடன் முடிந்தது]

oooooOooooo

இவ்வளவு மிகப்பெரிய படத்தினை FRAME செய்து வீட்டில் மாட்டுவது என்பதோ, அதைப்பாதுகாத்து, பராமரிப்பது என்பதோ நாளடைவில் மிகுந்த சிரமமாக இருக்கக்கூடும் என்பதை உணர்ந்தே கோயிலில் மாட்டச் சொல்லி உத்தரவு பிறப்பித்திருப்பார்கள், என என்னையே நான் சமாதானம் செய்துகொண்டேன். 

எப்படியோ நான் வரைந்த ஒரு ஓவியம் ஸ்ரீஸ்ரீஸ்ரீ மஹாபெரியவாள் அவர்களின் திருக்கரங்களுக்கு சென்று சிறிது நேரம் அவர் அதில் தன் அருட்பார்வையைச் செலுத்தி, அதனை கோயிலில் மாட்டச்சொல்லி ஆக்ஞையிட்டதே, எனக்குக்கிடைத்த மாபெரும் பொக்கிஷமான  அனுக்கிரஹம் என நான் எண்ணி மகிழ்ந்தேன்.

ஒவ்வொருமுறை நான் தரிஸனத்திற்குச் சென்றபோதும் இதுபோன்று எனக்கு ஸ்ரீஸ்ரீஸ்ரீ ம்ஹாபெரியவாளுடன் ஏற்பட்டுள்ள பல்வேறு சுகானுபவங்களை நான் யாரிடமும் அதிகமாக வெளிக்காட்டிக்கொள்வது இல்லை.  

இந்த நான் வரைந்த ஸ்ரீ காமாக்ஷி அம்மன் ஓவியத்தை, கோயிலில் மாட்டச்சொல்லி ஸ்ரீஸ்ரீஸ்ரீ மஹாபெரியவா ஆக்ஞை இட்ட விஷயம்  மட்டும், கவிஞர் நெல்லை பாலு அவர்களுக்கு எப்படியோ தெரிந்து விட்டதால், அவர்  என்னை மிகவும் வற்புருத்தி, அதைப்பற்றி ஓர் கட்டுரையாக என்னைவிட்டு எழுதித்தரச்சொல்லி வாங்கிக்கொண்டு விட்டார். 

அவரால் 1995ல் வெளியிடப்பட்ட “தெய்வ தரிஸனம்” என்ற புத்தகத்தில் அச்சேற்றி வெளியிட்டும் விட்டார். 

ஏற்கனவே அச்சேறி வெளியிடப்பட்டுள்ள உண்மை நிகழ்ச்சி என்பதால் நானும் இதை இங்கு இப்போது உங்களுடன் பகிர்ந்து கொண்டுள்ளேன். 

 தொடரும்

  

    

oooooooooooooooooooooooooooooooooo

**’ராயபுரம் ஸ்ரீ பாலு’** அவர்கள் + 

**’திருச்சி ஸ்ரீ. ஸ்ரீகண்டன்’** அவர்கள் 

பற்றிய சில முக்கியமான செய்திகள்: 

இருவருமே தங்கள் வாழ்க்கையில் திருமணம் செய்துகொள்ளாத பிரும்மச்சாரிகள். இருவருமே காசு பணத்தைத் துச்சமாக நினைத்தவர்கள். இடுப்பு வேஷ்டி துண்டு தவிர மற்ற எல்லாவற்றையும் உதறி எறிந்துவிடும் உத்தமர்கள். ஸ்ரீமடத்தில் சம்பளம் ஏதும் வாங்காமல் உண்மையான பக்தியுடன் கடைசிவரை உழைத்து பகவத் கைங்கர்யம் செய்தவர்கள். 

இருவருமே ஸ்ரீஸ்ரீஸ்ரீ மஹாஸ்வாமிகளுடன் கூடவே இருந்து, சுமார் 30 வருடங்களுக்கு மேல் [1965-1994] ஸ்ரீஸ்ரீஸ்ரீ மஹாஸ்வாமிகளுக்கு கைங்கர்யம் செய்து வந்தவர்கள். இது சாதாரணதோர் விளையாட்டு விஷயம் அல்ல. மிகவும் குறிப்பறிந்து நடக்க வேண்டிய கஷ்டமான வேலை. 

இரவு பகல் எந்நேரமும் விழிப்புடன் இருந்து செயல்பட வேண்டும். பசிபட்டினி இருக்க வேண்டும். ஸ்ரீஸ்ரீஸ்ரீ பெரியவாளுக்கு பிக்ஷை நடைபெறாமால், பிக்ஷை நடத்தி வைக்காமல் இவர்கள் எதையும் சாப்பிடவோ, தண்ணீர் அருந்தவோ கூட முடியாது. ஸ்வாமிகள் ஒருநாள் அல்லது இரண்டு நாட்கள் விரதம் பட்டினியென்றால் இவர்களும் பட்டினி இருக்கத்தான் வேண்டியிருக்கும். 

சித்தன் போக்கு சிவன் போக்கு என்பது போல ஸ்ரீ ஸ்வாமிகள் எப்போது எழுந்து நிற்பார், எப்போது எங்கே புறப்படுவார் என யாராலும் கேட்கவோ, சொல்லவோ, தீர்மானிக்கவோ, அனுமானிக்கவோ முடியாது. 

அதனால் எப்போதுமே இவர்கள் இருவரும் மிகுந்த விழிப்புணர்வுடன் தான் இருக்க வேண்டும். ஸ்ரீ ஸ்வாமிகளுக்கு ஸ்நானத்திற்கான ஏற்பாடுகள், மடி வஸ்திரங்கள், தியானம், பூஜை, நித்யப்படி அனுஷ்டானங்கள் முதலியவற்றிற்கான அடுத்தடுத்த தேவைகளை கவனிக்க வேண்டியிருக்கும். 

திடீரென்று ஸ்வாமிகள் விடியற்காலம் 3 மணி சுமாருக்கு எங்கேயாவது புறப்பட்டால், இவர்களும் அதற்கெல்லாம் தயாராக இருக்க வேண்டும். 

சின்னக்காஞ்சீபுரம், தேனம்பாக்கத்தில் சிவாஸ்தானம் என்ற இடத்தில் ஸ்ரீ மஹாபெரியவா நீண்ட நாட்கள் தனியே, ஓர் கிணற்றடிக்குப்பின்புறம் கொட்டகை போட்டுக்கொண்டு தங்கியிருந்தார்கள். தரிஸனத்திற்கு வருவோர் அந்தக்கிணற்றுக்கு முன்புறம் நின்றே, கிணற்றுக்குப்பின்னால் உள்ள  அவர்களை தரிஸிக்க வெண்டும் என ஏற்பாடுகள் செய்திருந்தார்கள். 

முதல் நாள் மாலை தரிஸனம் செய்த நானும் என் குடும்பத்தாரும் மறுநாள் காலையில் மீண்டும் தரிஸனம் செய்ய வேண்டும் என விரும்பியதால், அங்கே அருகில் இருந்த உபநிஷத் ப்ரும்மேந்திர மடம் என்னும் இடத்தில் ஸ்ரீ கோபால தீக்ஷதர் என்பவர் வீட்டில் ஓர் இரவு தங்க நேர்ந்தது. 

அது மிகவும் குளிரான மார்கழி மாதம். விடியற்காலம் 4 மணிக்குள் வாசலில் ஒரே ஒரே பரபரப்பு.  விடியற்காலம் 3.30 மணிக்கே ஸ்ரீஸ்ரீஸ்ரீ மஹாபெரியவா புறப்பட்டு, மிகப்பெரிய வரதராஜ பெருமாள் கோயிலின் வெளிப்பிரகாரத்தை படுவேகமாக பிரதக்ஷணம் செய்யக்கிளம்பி விட்டார்கள், எனக்கேள்விப்பட்டு நானும் ஓடினேன். 

விளக்கு வெளிச்சம் கொடுத்துக்கொண்டு இவர்கள் இருவரும் [ஸ்ரீ பாலுவும் ஸ்ரீ ஸ்ரீகண்டனும்] கூடவே ஓடுகிறார்கள்.  அதற்குள் நிறைய ஜனங்களும் தரிஸனத்திற்கு வந்து சேர்ந்து கொண்டு விட்டார்கள். 

ஜனங்கள் யாரும் நமஸ்காரம் செய்யவேண்டும் என்ற ஆர்வத்தில் ஸ்ரீ மஹாபெரியவா மேல் பட்டுவிடாதபடி, கட்டுப்பாடுகள் செய்ய வேண்டியதும் இவர்கள் வேலையாகவே இருந்தது. 

பலர் வீடுகளில் வாசல் தெளித்து கோலம் போட்டு, ஸ்ரீஸ்ரீஸ்ரீ மஹா பெரியவாளுக்கு பூர்ணகும்பம் கொடுத்து வரவேற்பதும், ஹாரத்தி சுற்றி கற்பூரம் ஏற்றுவதுமாக விடியற்காலம் நாலு மணிக்கே வெளிப்பிரகார நான்கு வீதிகளிலுமே ஒரே அமர்க்களமாக இருந்ததைக்கண்டு ரஸித்தேன்.

சிலசமயங்களில் ஸ்ரீ ஸ்வாமிகளை இவர்கள் இருவரும் உரிமையோடு கோபித்துக்கொண்டு, எப்படியாவது கொஞ்சம் ஆகாரம் அவர்கள் எடுத்துக்கொள்ள வைப்பது என்பது மிகவும் கஷ்டமான காரியம்.  

சின்னக் கைக்குழந்தைக்கு அதன் தாய் வாத்சல்யத்துடன், விளையாட்டுக்காட்டி, செல்லமாக கோபித்து, சோறு ஊட்டுவது போல மிகவும் கஷ்டமான வேலை தான், ஸ்ரீஸ்ரீஸ்ரீ பெரியவாளுக்கு பிக்ஷை செய்து வைப்பது என்பதும். 

அவர்களுக்கான உணவுகளில் நிறைய கட்டுப்பாடுகள் விதிமுறைகள் உண்டு. சில மாதங்களில் அரிசி, பருப்பு வகைகள் போன்ற தான்யங்களே எதுவும் சேர்க்கக்கூடாது.   சிலமாதங்க்ளில் காய்கறிகள், சில மாதங்களில் பழ வகைகள், சில மாதங்களில் பால் தயிர் போன்றவை தள்ளுபடி செய்ய வேண்டியிருக்கும். அவரின் வாழ்நாளில் கடைசி காலங்களில் ஒரே ஒரு வேளை மட்டும், ஒரு கொட்டாங்கச்சி அளவு நெல் பொரியில் தயிர் சேர்த்து சாப்பிட்டு வந்ததாகச் சொல்வார்கள். அவர்களின் தபஸ் வலிமையினால் மட்டுமே நீண்ட காலம் ஆரோக்யமாக வாழ்ந்துள்ளார்கள்.

இந்த பாலுவும், ஸ்ரீகண்டனும் தனக்காகவே இப்படிப் பட்டினி கிடக்கிறார்களே என்று இரக்கப்பட்டு, ஸ்ரீ ஸ்வாமிகள் அவர்களும் பிக்ஷைக்கு அமர்வதும் நடைபெற்றதுண்டு எனக் கேள்விப்பட்டுள்ளேன்.  

அதுபோல ஆயுர்வேத வைத்யமும், மருந்து தயாரிப்புகளும் தெரிந்துகொண்டிருந்த ஸ்ரீ ஸ்ரீகண்டன் அவர்கள், ஸ்ரீ பெரியவாளை மிகவும் கெஞ்சிக்கூத்தாடி வற்புருத்தி ஒருசில சூர்ணங்கள், லேகியங்கள், கஷாயங்கள் முதலியன, சிரத்தையாகத் தானே தன் கைப்படத் தயாரித்து ஸ்ரீஸ்ரீஸ்ரீ மஹாபெரியவாளை அவ்வப்போது சாப்பிட வைப்பதும் உண்டு எனக்கேள்விப்பட்டுள்ளேன். 

இதுபோல கண்களை இமைகள் காப்பது போல ஸ்ரீஸ்ரீஸ்ரீ மஹாபெரியவாளுக்கு இவர்கள் இருவரும் தூய அன்புடனும், வாத்சல்யத்துடனும், பக்தியுடனும் பகவத் கைங்கர்யம் செய்யும் பாக்கியம் பெற்றிருந்தார்கள்.  THEY WERE ONLY, LOOKING AFTER ALL THE PERSONAL NEEDS OF "HIS HOLINESS MAHA SWAMIGAL"  FOR MORE THAN 30 YEARS FROM 1964 TO 1994.

இவர்கள் இருவரும் ஸ்ரீஸ்ரீஸ்ரீ மஹாஸ்வாமிகளுடன் தங்களுக்கு ஏற்பட்டுள்ள பல்வேறு சுவையான  MIRACLE  அனுபவங்களைச் சொல்லச்சொல்ல நான் அவற்றை மிகவும் ஆர்வமாகக்கேட்டு அறிந்து, மகிழ்ந்தது உண்டு. 

இதில் ஸ்ரீ. ஸ்ரீகண்டன் என்கிற வைத்யலிங்க ஸர்மா பிறந்த ஊர் : காரைக்குடி அருகில் உள்ள வேலங்குடி என்ற கிராமம். அவர் பிறந்த நாள்: 04.04.1937. ஆனால் இவரின் சொந்த ஊர் : திருச்சி. பூர்வீகம்: லால்குடிக்கு அருகே உள்ள ஆங்கரை கிராமம். 

இவரும் பிறகு சந்நியாசம் வாங்கிக்கொண்டார். சந்நியாச ஆஸ்ரமம் காஞ்சீபுரம் காமாக்ஷி அம்மன் கோயில் குளத்தில் மேற்கொண்ட நாள்: 24.02.2002.  அதுமுதல் ஸ்ரீ ஸதாசிவானந்த தீர்த்த ஸ்வாமிகள் என அழைக்கப்பட்டார்.

இவர் சந்நியாஸம் மேற்கொண்ட 24.02.2002 அன்று எடுக்கப்பட்ட புகைப்படம். அருகில் உயரமாக நிற்பவர் ராயபுரம் ஸ்ரீ. பாலு அவர்கள்.

இந்த ஸ்ரீ.ஸ்ரீகண்டன் என்று அழைக்கப்பட்ட ஸ்ரீ ஸதாசிவானந்த தீர்த்த ஸ்வாமிகள் ஸித்தியடைந்து ப்ருந்தாவனப்பிரவேசம் ஆன நாள்: 11.05.2003

இவரின் அதிஷ்டானம் திருச்சி லால்குடிக்கு அருகில் உள்ள ஆங்கரை என்னும் கிராமத்தில் காயத்ரி நதி என்ற வாய்க்கால் கரையோரம் அமைந்துள்ளது. 

வரும் 21.04.2013 அன்று இவருக்கு திருச்சி டவுனில் 10ம் ஆண்டு நிறைவு ஆராதனையும், அதே தினம் ஆங்கரையில் அமைந்துள்ள இவரின் அதிஷ்டானத்திற்கு சிறப்பு பூஜைகளும் நடைபெற உள்ளன.

ஸ்ரீஸ்ரீஸ்ரீ மஹாபெரியவா 

குளத்தில் ஸ்நானம் செய்யும் போது

சுமார் 30 ஆண்டுகளுக்கு முன்பு 

எடுக்கப்பட்டுள்ள புகைப்படம்.

உடன் இருக்கும் ஆறு பேர்களில்

முதலில் இருப்பது ராயபுரம் ஸ்ரீ பாலு அவர்கள்

மூன்றாவதாக இருப்பது திருச்சி ஸ்ரீ. ஸ்ரீகண்டன் அவர்கள்

குளக்கரையில் தியானத்தில் / அனுஷ்டானத்தில்

ஸ்ரீஸ்ரீஸ்ரீ மஹாபெரியவா அமர்ந்துள்ளார்

அருகே நிற்பது ஸ்ரீ. ஸ்ரீகணடன் அவர்களும் 

+ ஸ்ரீ. பாலு அவர்களும்

இது சுமார் 40 ஆண்டுகளுக்கு முன்பு 

எடுக்கப்பட்டுள்ள புகைப்படம்.

பரிசலில் ஸ்ரீஸ்ரீஸ்ரீ மஹாபெரியவா பயணிக்க

இடது ஓரமாக ராயபுரம் ஸ்ரீ. பாலு அவர்களும்

வலது ஓரம் திருச்சி ஸ்ரீ. ஸ்ரீகண்டன் அவர்களும்

உடன் பயணம் செல்லுகிறார்கள்.

ஸ்ரீ ராயபுரம் பாலு என்பவர் சமீபத்தில், சென்ற மாதம் [மார்ச் 2013 முதல் வாரத்தில்]  கும்பமேளா நடந்தபோது, அலஹாபாத் திரிவேணியில், சந்நியாஸம் மேற்கொண்டுள்ளார்கள். அவர்கள் இனி ஸ்ரீ ஸ்வாமிநாதேந்திர சரஸ்வதி ஸ்வாமிகள் என அழைக்கப்படுவார்கள். இவர்கள் இப்போது ஸ்ரீ காஞ்சி சங்கரமடத்தில் உள்ள ஸ்ரீஸ்ரீஸ்ரீ மஹாஸ்வாமிகளின் அதிஷ்டானத்தின் அருகே ஓர் குடிலில் தங்கியுள்ளார்கள். 

ஸ்ரீஸ்ரீஸ்ரீ மஹாஸ்வாமிகளுடன் மிகுந்த ஈடுபாடு கொண்டிருந்த பக்தகோடிகள் அனைவருக்குமே, இந்த ராயபுரம் ஸ்ரீ பாலு + திருச்சி ஸ்ரீ. ஸ்ரீகண்டன் ஆகிய இருவரையும் தெரியாமல் இருக்க வாய்ப்பே இல்லை. 

அடியாருக்கு அடியாராக அருந்தொண்டுசெய்து வந்த இவர்கள் இருவரையும் பற்றி மற்ற அனைவரும் தெரிந்து கொள்ளட்டும் என எண்ணி இங்கு இவர்களைப்பற்றி சிறப்பித்து எழுதியுள்ளேன்.

சிவன் அடியார்களாக விளங்கிய 63 நாயன்மார்கள் பற்றி புத்தகங்களில் படித்துள்ளேன். அவர்களில் யாரையும் நான் நேரில் பார்த்தது இல்லை. 

என்னைப்பொறுத்தவரை, பரமேஸ்வரனின் அவதாரமாகத் திகழ்ந்து வந்த   ஸ்ரீஸ்ரீஸ்ரீ மஹாபெரியவாளுக்கு அருந்தொண்டு ஆற்றிய இந்த ராயபுரம் ஸ்ரீ. பாலு அவர்களையும், திருச்சி ஸ்ரீ. ஸ்ரீகண்டன் அவர்களையும் 64வது + 65வது நாயன்மார்களாகவே என்னால் நினைத்து மகிழமுடிகிறது.  

-=-=-=-=-=-=-=-=-=-=-=-=-=-=-=-=-=-=-=-=-=-=-=-=-=-

ooooooooooooooooooooooooooooooooooooooooo

ஸ்ரீஸ்ரீஸ்ரீ மஹாபெரியவாளுக்கு பல்லாண்டுகள் கைங்கர்யம் செய்துள்ள 

ராயபுரம் ஸ்ரீ பாலு என்ற பிரும்மச்சாரி 

2013 மார்ச் மாதம் சந்நியாசம் பெற்றபின், 

ஸ்ரீ ஸ்வாமிநாதேந்திர சரஸ்வதி ஸ்வாமிகள் 

என அழைக்கப்பட்டு வந்தார்கள்.

பூர்வாஸ்ரமத்தில் ராயபுரம் ஸ்ரீ பாலு என்று அனைவராலும் 

அன்புடன் அழைக்கப்பட்ட ஸ்ரீ ஸ்வாமிநாதேந்திர சரஸ்வதி ஸ்வாமிகள் 

நேற்று 19.01.2016 இரவு காஞ்சிபுரத்தில் ஸித்தியடைந்து, 

இன்று 20.01.2016 அங்கேயே காஞ்சிபுரத்தில் அவருக்கான 

பிருந்தாவனப்பிரவேஸம் நடைபெற்றுள்ளது. 

அதற்கான படங்கள் இந்தப்பதிவினில் இங்கு கீழே

புதிதாக இப்போது இணைக்கப்பட்டுள்ளன. 

இது அனைவரின் தகவலுக்காக மட்டுமே. 

பூர்வாஸ்ரமத்தில் ராயபுரம் ஸ்ரீ. பாலு அவர்கள்

19.01.2016 இரவு காஞ்சிபுரத்தில் 
ஸித்தியடைந்த நிலையில்

 

 

20.01.2016 காஞ்சிபுரத்தில் 

பிருந்தாவனப் ப்ரவேஸம் செய்தபோது

ooooooooooooooooooooooooooooooooooooooooo

oooooooooooooooooooooooooooooooooo

இந்தப் ’பொக்கிஷம்’  

தொடரின் அடுத்த பகுதி

21.04.2013 ஞாயிறு அன்று
வெளியிடப்படும்.

oooooooooooooooooooooooooooooooooo

என்றும் அன்புடன் தங்கள்
வை. கோபாலகிருஷ்ணன்