75 / 1 / 2 ] நதியை வரவேற்கும் கடல் !

2

ஸ்ரீராமஜயம்

எதிலுமே சரி, லெவல், அதாவது அளவு அறிந்து, அந்த மட்டத்தோடு நிற்கிற மனோபாவம் வந்தால் தான், சாந்தம் உண்டாகும்.

லெவலுக்கு மீறிச் செய்கிற ‘தாட்பூட்’ காரியங்கள் பிறருக்குப் பிரமிப்பூட்டலாம். 

ஆனால் இதனால், நாமே நம் சாந்தியைக் குலைத்துக் கொள்வதுதான் பலனாக அமையும்.

உருட்டல், புரட்டல், இரைச்சல் எல்லாவற்றையும் குறைத்து அடக்கமாக வருகிற நதியை சமுத்திரம் எதிர்கொண்டு சென்று வாங்கிக் கொள்கிறது. 

 

இதனால்தான் நதியின் சங்கம ஸ்தானங்களுக்குச் சிறிது தூரம் முன்னாலிருந்தே ஆற்று ஜலம் உப்புக்கரிக்கிறது. 

நாம் லெவலை மீறாமல், அடக்கமாகச் சென்றால், பரமாத்ம சமுத்திரம், நம்மை எதிர்கொண்டு அழைத்துப் போய்த்தனக்குள் அடக்கம் செய்து கொண்டு விடும்.  

   

 

  

oooooOooooo

02.11.2013 தீபாவளி 

பண்டிகையன்று 
அதிகாலையில் 

”மேட்டூர் ஸ்வாமிகள்” 

கோவிந்தபுரத்தில் 

ஸித்தியடைந்தார்கள்.

'மேட்டூர் ஸ்வாமிகள் '
என்று  அழைக்கப்பட்ட 
மிகப் புனிதமானவர்.

மேற்படி ஸ்வாமிகளைப்பற்றி அடியேன் அறிந்துள்ள ஒருசில தகவல்கள்:-

இவருடைய பூர்வாஸ்ரமப் பெயர் “இராஜகோபாலன்” என்பதாகும். 

இரசாயனப் பொறியியல் பட்டதாரியான இவர் சிறிது காலம் ’மேட்டூர் கெமிகல்ஸ்’ கம்பெனியில் பொறியாளராகப் பணியாற்றியவர். 

சிறுவயதிலேயே மிகுந்த ஞானமும், பக்குவமும் ஏற்பட்டுவிட்ட இவருக்கு, காஞ்சி மஹா ஸ்வாமிகளிடம் தீவிரமான பக்தி ஏற்பட்டது. 

சாக்ஷாத் பரமேஸ்வரனின் மறு அவதாரமே ஸ்ரீஸ்ரீஸ்ரீ காஞ்சி மஹா ஸ்வாமிகள் என்ற பேருண்மையை மிகச்சுலபமாக உணர்ந்து கொண்டுவிட்ட இவர், ஒருநாள் தன் அலுவலக வேலையை திடீரென ராஜிநாமா செய்து விட்டு, ஸ்ரீஸ்ரீஸ்ரீ மஹாபெரியவாளுக்குக் கைங்கர்யம் செய்ய வந்து சேர்ந்து விட்டார். 

ஒருசில வருடங்கள் மட்டுமே, ஸ்ரீஸ்ரீஸ்ரீ மஹாபெரியவாளுக்கு கைங்கர்யம் செய்யும் பாக்யம் கிடைத்த இவரை, துறவரம் மேற்கொள்ளுமாறு ஸ்ரீஸ்ரீஸ்ரீ மஹாபெரியவா ஆக்ஞை இட்டார்கள். 

தானும் துறவி ஆகிவிட்டால், தொடர்ந்து ஸ்ரீஸ்ரீஸ்ரீ மஹாபெரியவாளுக்குக் கைங்கர்யம் செய்ய முடியாது போகுமே என்று தன் மனதில் நினைத்தாலும், ஸ்ரீஸ்ரீஸ்ரீ மஹாபெரியவா ஆக்ஞையை மீற முடியாமல், அந்த ஆக்ஞையே தனக்குக் கிடைத்த மாபெரும் பாக்யமாகக் கருதிய இவரும், தன் பால்ய வயதினிலேயே துறவியானார்.  

அன்று முதல் இவர் மேட்டூர் ஸ்வாமிகள் என்றே பலராலும் அழைக்கப்பட்டு வந்தார்.  

வேத சாஸ்திரங்கள் அனைத்தும் கற்று அதன்படியே வாழ்ந்து காட்டியவர். மஹாஸ்வாமிகள் குறித்தும், அவர்களது சிந்தனைகள் குறித்தும் பல்வேறு தகவல்களை வெளியுலகுக்குக் கொண்டுவந்த பெருமைக்குரியவர்.

ஸ்ரீஸ்ரீஸ்ரீ மஹாபெரியவா மேற்கொண்டு வந்த சந்நியாஸ சம்ப்ரதாய நடைமுறைகள் அனைத்தையும் முழுமையாகத் தானும் கடைபிடித்து வந்தார். 

வாகனங்களில் செல்வதை முற்றிலுமாகத் தவிர்த்து விட்டு, பாத யாத்திரையாகவே பாரத தேசம் முழுவதும் உள்ள  கோயில்களுக்கும், மடங்களுக்கும் சென்று வந்துள்ளார். 

மக்களிடையே சமுதாய வளர்ச்சி, பசுமை மற்றும் இயற்கை நேசம், பசு வளர்ப்பு ஆகியவற்றில் அதிக ஆர்வத்தை ஏற்படுத்தினார்.  அனைத்துக் காரியங்களும் இறைவன் சித்தப்படி, ஸ்ரீஸ்ரீஸ்ரீ மஹாபெரியவா அருளால் நடக்கின்றன என்று சொல்லிவந்தார். 

ஞான வைராக்யங்கள் கொண்ட இவர் தன்னை வெளியுலகுக்கு அதிகம் தெரியப்படுத்திக் கொண்டது கிடையாது. தன்னை போட்டோ எடுப்பதைக்கூட தவிர்க்கும்படி பக்தர்களிடம் கேட்டுக்கொள்வார்.    

இவருடைய புகைப்படங்களோ, இவரைப்பற்றிய செய்திகளோ எங்கும் எதிலும் அதிகமாக வெளிவந்ததும் கிடையாது. அவர் இவற்றையெல்லாம் அடியோடு வெறுப்பவராகவே இருந்து வந்தார்.

துறவியானபின்பு ஸ்ரீஸ்ரீஸ்ரீ மஹாபெரியவாளுடனேயே சிலகாலம், தங்கி இருந்த இவர், ஸ்ரீஸ்ரீஸ்ரீ மஹாபெரியவா ஸித்தியான பிறகு, கும்பகோணம் அருகில் உள்ள கோவிந்தபுரம் என்ற ஊரில்  *ஸ்ரீ மஹாஸ்வாமிகளின் தபோவனத்தில்*ஓர்  குடிலில் ஆஸ்ரமம் அமைத்துக்கொண்டு தங்கியிருந்து, அங்கு வரும் பக்தர்களுக்கு அருளாசி வழங்கி வந்தார். 

[*தற்போது மிகப்பெரியதாகவும் மிகப்பிரபலமாகவும் அமைந்துள்ள ஸ்ரீ பாண்டுரங்கன் கோயிலின் பிரதான நுழைவாயிலுக்கு நேர் எதிர்புறம் அமைந்துள்ளது இந்தத் தபோவனம்* ]

மஹா ஞானியான இவரை, [மூன்று சந்தர்ப்பங்களில்] நேரில் தரிஸித்து, நமஸ்கரித்து, மனம்விட்டுப்பேசி மகிழ்ந்த பாக்யம் பெற்றவர்களில், அடியேனும் ஒருவன் என்பதைத் தெரிவித்துக்கொள்கிறேன்.

 ஸ்ரீ இராஜகோபாலன்  அவர்கள்

தன் பால்ய வயதில் 

ஸ்ரீஸ்ரீஸ்ரீ மஹாபெரியவாளுடன்

சேர்ந்து உள்ள ஓர் அபூர்வமான படம். 

ஸ்ரீஸ்ரீஸ்ரீ மஹாஸ்வாமிகளுடன் 

உள்ள  இந்தக்கூட்டத்திலும் 

இடதுபுற ஓரமாக கைகட்டி நிற்பவர் 

ஸ்ரீ இராஜகோபாலன் அவர்களே !

-oOo-

திவ்ய க்ஷேத்ரமான கோவிந்தபுரத்தில் [தனது 74வது வயதில்] ஸித்தியடைந்து, ஸ்ரீஸ்ரீஸ்ரீ மஹா பெரியவாளின் திருவடிகளை அடைந்துள்ள இந்த மஹானுக்கு, அங்கேயே ஓர் ப்ருந்தாவன அதிஷ்டானம் அமைத்துள்ளார்கள். 

கோவிந்தபுரத்திற்குச் செல்லும் வாய்ப்பு கிடைப்பவர்கள் இந்த மஹானின் ப்ருந்தாவன அதிஷ்டானத்தை 12 பிரதக்ஷணங்கள் செய்து, நான்கு நமஸ்காரங்கள் செய்து விட்டு வரவும். 

இவ்வாறு எளிய வாழ்க்கை வாழ்ந்த, மஹாஞானிகளான மஹான்களின் ஆசியாலும், அனுக்ரஹத்தாலும் நம் அனைவரின் வாழ்விலும் சுபமங்கல நிகழ்ச்சிகள் ஏற்படும் என்பது ஸத்தியம்.

அன்புடன் VGK


oooooOooooo

பிரமிக்க வைக்கும்

ஸ்ரீஸ்ரீஸ்ரீ மஹா பெரியவாளின் தமிழ்

தமிழ் மொழியிலே பெரியவாளுக்கு இருந்த பேரறிவு முத்தமிழ்க் காவலர்களையெல்லாம் பிரமிக்க வைக்கிறது.

ஒரு முறை கி.வா.ஜ-விடம், “தமிழ் என்றால் என்ன?” என்று கேட்டார். 

மேலும் “சமஸ்கிருதம் என்றால், செம்மை செய்யப்பட்ட மொழி என்று அர்த்தம்! அப்படி தமிழுக்கு ஏன் அந்தப் பெயர் வந்தது சொல்லுங்கள்!” என்கிறார்.

கி,வா.ஜ. அடக்கமாக, ”பெரியவா சொன்னால் தெரிந்து கொள்கிறேன்!” என்றார்

“எந்த மொழியிலும் இல்லாத சிறப்பான எழுத்து ‘ழ’ என்பது. இந்த எழுத்து வரக் கூடிய எந்தச் சொல்லும், அழகு, இனிமை இவற்றைக் குறிப்பதகாவே இருக்கும். 

மழலை, குழல், அழகு, குழந்தை, கழல், நிழல், பழம், யாழ் இப்படி ‘ழ’ வருகிற எல்லாமே நமக்குப் பிடித்தவை. ஆகவே இனிமையான ‘ழ’வைத் தம்மிடத்தில் உடையது ‘தமிழ்’ (தமி+ழ்) என்று சொல்லலாமா” என்கிறார்.

உடனே கி.வா.ஜ., “இதைவிடப் பொருத்தமாக சொல்ல முடியுமா? இனி எல்லா மேடைகளிலும் நான் இதைச் சொல்லுவேன்!” என்றாராம்.

சீர்காழிப் பதிகத்தில் நற்றமிழ் வல்ல ஞானசம்பந்தர் பாடியிருக்கும் “யாமா மாநீ யாமா மா” என்ற மாற்றுமாலைப் பதிகம் மிகவும் கடினம். 

அவற்றுள் ஒன்றைப் பெரியவா எடுத்து, மிகவும் கடினமான அந்தப் பதிகத்தைப் பிரித்துப் பிரித்து மிக எளிமைப்படுத்திப் பொருள் சொன்னார். பெரிய வித்வான்கள் பிரமித்துப் போனார்கள்.

அதுபோல் காளமேகப் புலவர் பாடிய பாடலில் ஒன்று, முக்கால், அரை, கால், அரைக்கால், இருமா, மாகாணி, ஒருமா, கீழரை என்று குறைந்துகொண்டே வரும் அளவுகளை வைத்து எழுதுகிறார், தெரியுமா?” என்று கேட்டு,

முக்காலுக்கு ஏகாமல் முன்னரையில் வீழாமுன்

அக்கா வரைக்கால் கண்டு அஞ்சா முன்

விக்கி இருமாமுன், மாகாணிக்கேகாமுன்

கச்சி ஒருமாவின் கீழரை இன்றோது….

என்ற பாட்டை பெரியவா எடுத்துக் காட்டுகிறார்.

அதன் பொருளையும் தனக்கே உரிய முறையில், 

“முக்கால்னா மூன்று கால்கள். வயதான் பின் இரண்டு காலில் நடக்கத் தள்ளாடி ஒரு தடியை மூன்றாவது காலாகப் பயன்படுத்துகிறோமே….. அந்த நிலை வருவதற்குள், 

முன்னரையில் வீழாமுன்… தலைமுடியில் நரை வருவதற்கு முன்னாலே 

விக்கலும் இருமலும் வருவதற்கு முன்…. 

யமனுடைய காலடி நம்மை அணுகுவதற்கு முன்….. 

ஊருக்கு வெளியிலுள்ள மாகாணி என்ற சுடுகாட்டுக்குப் போகும் முன்…

காஞ்சியில் ஒரு மாமரத்தின் கீழ் உள்ள ஏகாம்பரேசுவரரை இன்றைக்கே துதிப்பாய்!” என்று மிக அழகாக விளக்குகிறார்.

மேலும் “என்ன அழகு பார்த்தேளா! [ஏகம் என்றால் ஒன்று] ஒன்று என்ற  அந்த ஏகாம்பரரை, அந்த ஒன்று என்ற எண்ணுக்குக் கீழேயே உள்ள கீழரை வரை எட்டு அளவுகளையும் கோத்துத் துதித்திருக்கிறாரே!” என்று சொல்லிச் சொல்லி மகிழ்ந்தார்.

எதையுமே இப்படி விளக்கமாகப் பொழிந்து தள்ளியதைக் கேட்டவர்கள் பாக்யசாலிகள்!!

[Thanks to Sage of Kanchi 29 09 2013]

oooooOooooo

இதன் தொடர்ச்சி 

இன்றே இப்போதே 

தனிப்பதிவாக வெளியிடப்பட்டுள்ளது.

காணத்தவறாதீர்கள்.

பகுதி 75 / 2 / 2   

தலைப்பு:

பச்சைக்கிளி ....

முத்துச்சரம் ....

முல்லைக்கொடி .... 

யாரோ ?