ஜீவி - புதிய நூல் - அறிமுகம் - பகுதி 1

2

ஸ்ரீராமஜயம்

 

    

ஸ்ரீ இராஜராஜேஸ்வரி அம்பாள் துணை

http://gopu1949.blogspot.in/2013/08/blog-post.html

{ இந்தப்பதிவினில் ஸ்ரீ ஆதிசங்கரர் அருளிய

ஸ்ரீ இராஜராஜேஸ்வரி அஷ்டகம் இடம்பெற்றுள்ளது }

   

அன்புடையீர்,

அனைவருக்கும் என் பணிவான வணக்கங்கள். நீண்ட நாட்களுக்குப்பின் தங்கள் அனைவரையும் இந்த என் பதிவின் மூலம் இன்று சந்திக்கும் வாய்ப்பு எனக்குக் கிட்டியுள்ளதில் மிகுந்த மகிழ்ச்சியடைகிறேன்.

பல்வேறு சொந்தக்காரணங்களாலும், என் கணினியில் அடிக்கடி ஏற்பட்டு வந்த BLOGGER PROBLEMS முதலியவற்றாலும் என் வலைத்தளத்தினையும், பிறர் வலைத்தளங்களையும் என்னால் திறந்து படிக்க முடியாமலும், கருத்தளிக்க முடியாமலும் இருந்து வந்தது. பிறகு சமீபத்தில் ஒருநாள், அந்தப்பிரச்சனை தானாகவே சரியாகி விட்டது. 

இதற்கிடையில் ’பயணங்கள் முடிவதில்லை’ என்ற தலைப்பில் நான் எழுதிய பதிவு ஒன்று என் இனிய நண்பர் திருச்சி தி. தமிழ் இளங்கோ அவர்களின் வலைத்தளத்தினில் 28.01.2016 அன்று வெளியிட நேர்ந்தது உங்களில் பலருக்கும் நினைவிருக்கலாம். அதில் என் மறுமொழிகள் உள்பட 127 பின்னூட்டங்கள் உள்ளன. 

இதோ அதற்கான இணைப்பு: 

http://tthamizhelango.blogspot.com/2016/01/by-vgk.html

oooooOooooo

07.02.2016 ஞாயிறன்று மாலை துளசிதளம் வலைப்பதிவரும், தற்சமயம் நியூஸிலாண்டில் வசிப்பவருமான திருமதி. துளசி கோபால் அவர்களை, அவர்களின் கணவருடன் திருச்சி ஸ்ரீரங்கத்தில் நேரில் சந்திக்க நேர்ந்தது. இவரே நான் நேரில் சந்திக்க நேர்ந்த 40வது பதிவராவார். அதுபற்றிய படங்களும் பதிவுகளும், அந்த சந்திப்பில் கலந்துகொண்ட சில பதிவர்களால் வெளியிடப்பட்டிருந்தன. அவைகளுக்கான இணைப்புகள்:

http://tthamizhelango.blogspot.com/2016/02/2016.html

http://venkatnagaraj.blogspot.com/2016/02/2016.html

http://sivamgss.blogspot.in/2016/02/blog-post_7.html

oooooOooooo

அதன்பிறகு, 13.02.2016 அன்று திரு. தி. தமிழ் இளங்கோ அவர்கள் ‘திரு. V.G.K. அவர்களுக்கு ஓர் வேண்டுகோள்’ என்ற தலைப்பில் ஓர் தனிப்பதிவும் வெளியிட்டிருந்தார்கள். 

அதற்கான இணைப்பு: 

http://tthamizhelango.blogspot.com/2016/02/vgk.html

அதில் அவரும், பின்னூட்டமிட்டிருந்த பலரும், நான் மீண்டும் வலைத்தளத்தினில் எழுத வேண்டும் என கோரிக்கை விடுத்து விரும்பிக் கேட்டுக்கொண்டிருந்தார்கள். அதில் திரு. தி. தமிழ் இளங்கோ அவர்களுக்கு நான் நன்றி கூறி, என் நிலைமைகளை விளக்கி, அவர் மட்டுமல்லாமல், அனைவருமே புரிந்துகொள்ளுமாறு ஒரேயொரு பின்னூட்டமும் கொடுத்திருந்தேன். அதன் முக்கியமான ஒரு பகுதி இதோ:

-=-=-=-=-=-

தற்சமயம் என் இல்லத்திலும், உள்ளத்திலும், உடல்நிலையிலும், என் கணினியின் உடல்நிலையிலும் பல்வேறு நெருக்கடிகளை நான் சந்திக்க வேண்டியுள்ளது. அதனால் என் வலைத்தளத்திலிருந்து நான் சற்றே ஒதுங்கி ஓய்வு எடுத்துக்கொண்டுள்ளேன். என் தற்போதைய நெருக்கடி நிலைமைகள் எனக்கு சாதகமாக மாறும்போது, ஒருவேளை நான் மீண்டும் என் வலைத்தளத்தினில் எழுத நேரிடலாம். இப்போதைக்கு அதுபற்றி ஏதும் என்னால் தெளிவாகக் கூற இயலாமல் உள்ளது.

என் மீதுள்ள பிரியத்தினால் அன்புடன் இந்தப்பதிவினை வெளியிட்டுள்ள தங்களுக்கும், அதில் பின்னூட்டங்கள் கொடுத்துள்ள வாசக நண்பர்கள் + என் நலம் விரும்பிகள் அனைவருக்கும் என் இனிய அன்பு நன்றிகளைத் தெரிவித்துக்கொள்கிறேன். 

என்றும் அன்புடன் VGK / 14.02.2016

-=-=-=-=-=-

இவ்வாறு வலையுலகிலிருந்து சற்றே ஒதுங்கி ஓய்வு எடுத்துவந்த எனக்கு, என் இனிய நண்பரும், என் எழுத்துலக மானஸீக குருநாதருமான திரு. ரிஷபன் அவர்களின் சமீபத்திய வெளியீடான ‘முற்றுப் பெறாத ஓவியங்கள்’ என்ற சிறுகதைத் தொகுப்பு நூலினை முழுவதுமாக ரஸித்துப் படித்து மகிழ முடிந்தது. 

அதைவிட ஆச்சர்யமாக என் மதிப்பிற்கும் மரியாதைக்கும் உரிய ’ஜீவி’ அவர்களின் சமீபத்திய நூல் வெளியீடு ஒன்றினை, முழுவதுமாக மிகுந்த ஆர்வத்துடனும், உற்சாகத்துடனும், சுவாரஸ்யமாகப் படித்து மகிழும் வாய்ப்பும் கிட்டியது. 

ஜீவி அவர்களின் இந்த நூல் என்னுள் பலவிதமான தாக்கங்களை ஏற்படுத்தி விட்டதாலும், வாசகர்களும் இன்றைய வலைத்தள எழுத்தாளர்களும் அவசியமாகப் படிக்க வேண்டிய நூல் இது என்று நான் கருதுவதாலும், அதைப்பற்றி தங்களுடன் என்னால் பகிர்ந்துகொள்ளாமல் ஒதுங்கி இருக்க இயலவில்லை. 

எனவே எனக்குள்ள பல்வேறு சொந்தப்பிரச்சனைகள் + கணினியில் அவ்வப்போது ஏற்பட்டு வரும் BLOGGER சோதனைகளையும் தாண்டி, இதுவே இந்தப்புத்தாண்டு 2016-இல் என் வலைத்தளத்தினில் நான் மகிழ்ச்சியுடன் வெளியிடும் முதல் பதிவாகவும் அமைந்துள்ளது என்பதையும் தங்கள் அனைவருக்கும் தெரிவித்துக்கொள்கிறேன்.

என்றும் அன்புடன் தங்கள்

  

(வை. கோபாலகிருஷ்ணன்)

 

’ஜீவி’ என்று நண்பர்களால் அன்புடன் அழைக்கப்படும் ’பூ வனம்’ http://jeeveesblog.blogspot.in/ வலைப்பதிவர் திரு. G. வெங்கடராமன் அவர்களின் நூலினை சமீபத்தில் சென்னை சந்தியா பதிப்பகம் வெளியிட்டுள்ளது. 

ஏற்கனவே இவரின் படைப்பினில் நான்கு சிறுகதை தொகுப்பு நூல்கள் வெளிவந்திருக்கின்றன. தமிழில் வெளிவரும் உயரிய படைப்புகளை கடந்த 50 ஆண்டுகளாக தொடர்ந்து வாசித்துவரும் 73 வயதான இவர் சென்னையில் வசித்து வருகிறார்.

தன் வாசிப்பு அனுபவம் மூலம் கண்டடைந்த 37 தமிழ் எழுத்தாளர்களின் படைப்புகள் அவருக்கு ஏற்படுத்திய தாக்கத்தின் விளைவே இந்த நூல் வெளியிட காரணமாக அமைந்துள்ளது. உன்னதமான தனது உணர்வெழுச்சிகளையும் விமர்சனங்களையும் எவ்வித ஆர்பாட்டமுமின்றி ஓர் எளிய நடையில் தன் சக வாசகர்களுடன் ஜீவி அவர்கள் பகிர்ந்துகொள்கிறார்.

”கங்கையைச் சொம்புக்குள் அடக்க முடியாதுதான். ஒரு நூற்றாண்டில் தமிழில் எழுதிக்குவித்த ஆயிரக்கணக்கான எழுத்துக் கலைஞர்களில் 37 என முடிவுக்கு வந்தது மிகவும் அநியாயம்தான் என்றாலும் பக்கக் கணக்கு நெருக்கடியில், ஒரு குறுக்குவெட்டுத் தோற்றத்தில், தமிழ் எழுத்துலகை வாசித்து அறிய இந்த அளவே சாத்தியமாயிற்று. பேராசிரியர் கல்கி, சாண்டில்யன், விக்கிரமன், நவீன இலக்கிய ஜெயமோகன் போன்றோருக்கு தனிப்புத்தகம்தான் போட வேண்டும்” என்கிறார் ஜீவி, தன் முன்னுரையில்.

நூல் தலைப்பு:

ந. பிச்சமூர்த்தியிலிருந்து 

எஸ்.ரா. வரை

மறக்க முடியாத தமிழ் எழுத்துலகம்

By ஜீவி

முதற்பதிப்பு: 2016

வெளியீடு:

சந்தியா பதிப்பகம்

புதிய எண் 77, 53வது தெரு, 9வது அவென்யூ

அசோக் நகர், சென்னை-600 083

தொலைபேசி: 044-24896979

sandhyapathippagam@gmail.com

sandhyapublications@yahoo.com

www.sandhyapublications.com

அட்டைகள் நீங்கலாக 264 பக்கங்கள்

விலை: ரூபாய் 225 

நூலின் முதல் பக்கத்தில் 

’சந்தியா பதிப்பகம்’ 

வெளியிட்டுள்ளவை

மூத்த எழுத்தாளர் ஜீவியின் படைப்புகள் பல பத்திரிகைகளில் பிரசுரமாகியிருக்கின்றன. நான்கு சிறுகதைத் தொகுப்புகள் வெளிவந்திருக்கின்றன. 1958-இல் இவரின் 15வது வயதில் ‘கல்கண்டு’ பத்திரிகையில் இவரின் முதல் கதை பிரசுரமானது. தொடர்ந்து கவிதை, கட்டுரை, சிறுகதை, நெடுங்கதை என்று எழுதுகலையின் எல்லா வகையிலும் எழுதிப் பார்த்தவர் இவர். இன்றும் இணையத்தில் எழுதிக்கொண்டிருப்பவர். ஜீவி கும்பகோணத்துக்காரர். சென்னையில் வசித்து  வரும் இவர் தொலைபேசித்துறையில் பணியாற்றி ஓய்வு பெற்றவர்.   

’ஜி. வெங்கடராமன்’,  ’ஜீவி’யானது அந்தக்கால பிரபல எழுத்தாளர் ‘ஆர்வி’யைப் பார்த்து வைத்துக்கொண்டது. ’முதலில் நான் வாசகன்.  அந்த வாசக உள்ளம்தான் என்னையும் எழுத வைத்தது’ என்று இன்றும் வாசகனாய் இருப்பதில் பெருமை கொள்பவர். அதுவே எல்லா காலத்து இலக்கியங்களையும் நேசிப்பவராய் இவரை வைத்திருக்கிறது. இவரில் படிந்து போயிருக்கும் அந்த வாசக உள்ளம்தான் தமிழின் தலைசிறந்த எழுத்துச்சிற்பிகளின் எழுத்தாக்கங்களில் தோய்ந்து இந்த நூலாக உருவெடுத்திருக்கிறது. ஒரு நூற்றாண்டு தமிழ் எழுத்துலகை வலம் வந்த உணர்வையும் நம்மில் ஏற்படுத்துகிறது.

ooooooOoooooo

இந்த நூல் அறிமுகத்தில் நாம் தொடர்ந்து இவர் சிலாகித்துச்சொல்லும் 37 எழுத்தாளர்களையும் பற்றி அவ்வப்போது கொஞ்சம் கொஞ்சமாகப் (ஒரு பானை சோற்றுக்கு ஒரு சோறு பதமாகப்) பார்ப்போம்.

இன்றைய வளரும் எழுத்தாளர்களும், பதிவர்களும் அவசியமாக இந்த நூலினை வாங்கிப் படித்துத் தங்களிடம் பொக்கிஷமாக வைத்துப் பாதுகாத்து வர வேண்டும் என்பது என் தனிப்பட்ட விருப்பமாகும். 

என்றும் அன்புடன் தங்கள்,

(வை. கோபாலகிருஷ்ணன்)

48 மணி நேர இடைவெளிக்குப் பிறகு 

தொடரும்....

  

இதன் அடுத்த பகுதியில் 

இடம்பெறப்போகும் 

இரு பிரபல எழுத்தாளர்கள்:

 

வெளியீடு: 16.03.2016 பிற்பகல் 3 மணிக்கு.

காணத் தவறாதீர்கள் !

கருத்தளிக்க மறவாதீர்கள் !!