ஸ்ரீமத் சுந்தரகாண்டத்தின் அபார மஹிமை [ பகுதி 4 of 8 ]

ஸ்ரீ கோவிந்த தாமோதர ஸ்வாமிகள்

பகுதி-15



ஸ்ரீமத் சுந்தரகாண்டத்தின் அபார மஹிமை
பகுதி 4 of  8

11.சுந்தர காண்டத்தில் ராமாயணத்தின் எல்லாக் காண்டங்களும் அடங்கியுள்ளன. அதனால் தான் இதற்கு இவ்வளவு பெருமை. ராமர் கதை முழுவதும் இதில் பல இடங்களில் வந்து விடுகிறது.

12.தர்மத்தில் நம்பிக்கையுடனும், ஆகார நியமம்களை அனுஷ்டித்தும், உலகத்தில் பெரும்பாலானவர்கள் செய்யும் தவறான விஷயங்களில் நாமும் ஈடுபடாமலும் இருந்து வந்தால், எப்படி இலங்கையில் ஸ்ரீ விபீஷ்ணன் ஒருவர் மட்டும் ஸ்ரீ ராமரிடத்தில் பக்தியுடன் இருந்த காரணத்தால், ஸ்ரீ ஆஞ்ஜநேயர் இலங்கையில் எல்லாவற்றையும் எரிக்கும் போது, விபீஷணரின் அரண்மனையை மட்டும் எரிக்காமல் விட்டாரோ, அதே போல இந்தக் கலியுகத்தில் நற்குணத்துடன் பகவானிடம் பக்தி செய்பவனை, கண்டிப்பாகக் காப்பாற்றுவார் என்று தெரிந்து கொள்ளலாம்.

13.சீதாதேவி ஆஞ்ஜநேயரிடம் “மறைவான இடத்தில் சற்று இளைப்பாறி விட்டுப் போ” என்று சொல்கிறாள். நம் கார்யமாக ஒருவர் செல்கிறார் என்றால் ‘ஸ்ரமத்தைப் பார்க்காமல்’ என்று தானே நாமெல்லாம் சொல்வோம்? ஆனால் சீதாதேவி சொல்வது எப்படி இருக்கிறது! பகவானின்/அம்பாளின் கருணை மனுஷ்யர்களுக்கு வருமா?

14.சீதை தற்கொலை செய்து கொள்ளலாம் என்று எண்ணினாள். அப்படிச் செய்திருந்தால் அவளுக்கு ஆஞ்ஜநேயரின் தரிசனம் கிடைத்திருக்குமா? 

எவ்வளவு துக்கம் வந்தாலும் தற்கொலை செய்து கொள்ளக்கூடாது. பல வருஷங்கள் கஷ்டங்களை அனுபவித்தாலும் ஒரு நாள் சுகம் வரும். இந்த நம்பிக்கையுடன் ஜீவித்திருக்க வேண்டும். ஆனால் துக்கத்தை அனுபவிக்கும் போதும் பாபகார்யங்களைச் செய்யவேகூடாது. அப்போது தான் சுகம் வரும்.

15.ஆஞ்ஜநேயர் சீதையிடம் “சுக்ரீவனின் வானர சைன்யத்தில் என்னைக் காட்டிலும் பலசாலிகள் இருக்கிறார்கள். என்னைவிட தாழ்ந்தவர்கள் ஒருவரும் இல்லை” என்று சொல்கிறார். இப்படிப்பட்ட வினயம் வரணும்.

அவர் இதை உணர்ந்து சொல்கிறாரே தவிர, அவையடக்கத்திற்காகக் கூறவில்லை. 

தன்னிடம் யோக்யதை ஒன்றுமே இல்லை, நான் மிகவும் சாதாரணமானவன் தான்,  என்று உணர்ந்து சொல்பவரிடத்தில் தான், எல்லா யோக்யதைகளும் இருக்கும். 

ஆஞ்ஜநேயருக்கு இந்த பாவனை வந்ததற்குக் காரணம் அவர் ‘100 யோஜனை விஸ்தீரணமான ஸமுத்திரத்தைத் தாண்டி வந்தோம்’ என்ற எண்ணமே இல்லாமல் இருந்தார். 

மேலும், அவர் தன்னைவிடத் தாழ்ந்தவர்கள் ஒருவரும் இல்லை என்று சொல்வதற்குக் காரணம், ‘என்னை விட எளியோர் யாரும் இல்லை; அதனால் தான் என்னை தூதராக அனுப்பியிருக்கிறார்’ என்று சொல்கிறார்.

தொடரும்